Monza-ah Italian GP an tlan zel dawn

Formula 1 inelna Italian Grand Prix chu Monza tlankawngah an tlan chhunzawm zel dawn a, kum 2031 thleng daih inremna an ziak fel tawh a ni.

Monza hi tuna F1 an tlan mekna ho zingah chuan a rei ber tawh a, tunah hian season ruk atan inremna hi ziah leh a ni a, car intlansiakna huangah chuan dinhmun pawimawh tak a luah chhunzawm ang.

F1 president leh chief executive officer ni bawk Stefano Domenicali chuan, "Monza hian Formula 1 huangah hmun pawimawh tak a chang a, kum tin mai hian boruak nuam leh hlimawm in chhawpchhuahsak ṭhin.

"Tun hnaia tlankawng leh a chhevel nasa taka thuam ṭhat a ni a, F1 lamin tunlai mila chei ṭhat duh kan neih tam takte pawh tih a ni dawn bawk," tiin Monza nen an inrem thei chu lawmawm a tih thu a sawi.