Bogut-a'n Basketball chawlhsan

Australian basketball player ropui Andrew Bogut chuan nimin khan infiamna a chawlhsan thu a sawi a, nakkuma Tokyo Olympic khel tur an ram tan channa lian tak a ni ngei ang.

Bogut hi kum 36 mi a ni tawh a, season 15 zet chu professional basketball a khel tawh. Hnungzâng leh ke rek hliam vangin a buai ve fo a, inelna lian Olympic khelh ngei la tum mah se Covid-19 vangin nakkuma an sawn a ngai a, a inlan thei dawn ta lo a ni.

Milwaukee Bucks aṭangin 2005 khan NBA bul a ṭan a, chumi hnuah Golden State Warriors a zawm. GSW tana a khelh lai hian Stephen Curry te ho nen NBA title an la a, basketball a khelh chhung a hun tawn san lai ber a tawng.

GSW hnuah NBA team dang Dallas Mavericks, Cleveland Cavaliers leh Los Angeles Lakers tan a khel leh a, a hun hnuhnung chu an ram club Sydney Kings tan a khel thung a ni. Bogut chuan, "Tuna ka taksa dinhmun ngaihtuah chuan nakkum nipui lo thleng tur thlenga inkhelh chu thil theih a ni lo. Tun hnai kum hnih chhung chu hliam leh buaina hrang hrang vangin harsatna ka tawk.

"Kum a tam hnuah chuan hliam a dam har tawh a, buaina hi a fel mai thei ṭhin lo. Hreh leh harsa ti tak chungin ka infiamna ngainat leh hmangaih chu ka mangṭha a ngai ta a ni," tiin a sawi. Bogut hian Australia tan Olympic vawi thum a khel a, 2016 Rio Olympic-ah khan an ram hi palina a nih pui.