Australian Open a chiang hnai

Tennis season khat chhunga Grand Slam hmasa ber Australian Open dinhmun a la chiang lo a, tournament CEO Craig Tiley chuan inelna an kalpui dan tur an ti chiang thei dawn hnai niin a sawi.

Covid-19 vangin infiamna khawvel a la buai chhunzawm zel, hei vang hian Australian Open khel tur player awm dan turah zawhna a tam. Melbourne awmna state Victoria thuneitu lam chuan player hi hma taka zin lut turin an duh.

Tennis Australia (TA) chuan sorkar thuneitu hnenah player khung hran chungchangah ngaihhnathiamna an dilsak a, ram dang aṭanga zin lutte chu khunghran an nih lai pawhin an training phalsak an ni dawn. Tiley chuan, "Aus-tralian Open 2021 atana ruahmanna chu peih fel a ni ṭep tawh. Tunah chuan engkim mai hi Victoria sorkar thutlukna ngaihchan a ngai, kan ruahmanna siamte min pawmsak ngei pawh kan beisei," a ti.

Kum 1987 aṭang khan Australian Open hi kum tin January thlaah khelh ṭhin a ni a, nakkum atan pawh hian January 18 aṭanga khelh tura tih a ni. Hri leng vang hian an hun an sawn dawn nge kalphung an thlak dawn tih hriat a la ni lo.