NBA Finals-a Cavaliers hmachhawn tur Warriors

Western Conference final Game 5-ah Golden State Warriors-in Houston Rockets 104-90 in an hneh a, series-ah 4-1 a chakin NBA Final-ah Cleveland Cavaliers an hmachhawn ang.

Warriors hian final thleng turin kum 40 chhung an nghak a, Stephen Curry kaihhruaina hnuaiah kum 1975 hnua a vawi khatna atan final an thleng .

Oracle Arena-ah Houston Rockets-in comeback tumin bul an ṭan ṭha a, first quarter-ah 22-17 in hma an hruai hman. Amaherawhchu Warriors-in hun ṭha bawhpelh an tum lo a, an defence ṭhat zar­ah Game 4-a point 45 score-tu Rockets shooting guard James Harden chuan kumin chhunga a game chhiat ber ṭum a tawng.

Turnover ngah Harden

Houston Rockets star Harden hian minute 44 chhungin vawi 10 shot a nei a, vawi hnih chiah a lut. Chu chauh chu a ni lo, Harden defence a ṭhat tawk loh avangin Warriors shooting guard Klay Thompson-a'n point 20 a score bawk.

Rockets tlawm zan hian Harden hian vawi 13 zet ball hloh (turnover) a nei a, playoff game-a record thar a ni. Hemi hmaa record siamtu chu John Williamson a ni a, kum 1979 khan turnover vawi 11 a nei.

MVP atan Curry?

Warriors point guard Curry-a'n point 26 zet a score a; small forward Harrison Barnes point 24 a khung ve bawk.

Mipuiin an chakna chhan an hria a, an au hla chu “M-V-P!” niin an tih chhan chu Curry a ni.

Lebron Vs Curry

NBA MVP ṭum li ni tawh Lebron James ṭhatzia sawi nawn a ngai tawh lo a, Curry nena NBA Final-a an intawng tur hian ngaihven a hlawh hle.

Feb 26 khan James-a kaih­hruaina hnuaiah Cleveland Cavaliers-in 110-99 in Warriors an hneh a, Cavs star James hi Curry aiin a langsar zawk. Hemi ṭum hian James-a'n point 42 a score a, rebounds 11 lain assists vawi nga a nei bawk. Curry erawhin point 18 a nei a, rebounds vawi ruk lain assists vawi thum neiin James a pha lo hle.

January 9-a Cavs-Warriors inkhelh ṭumin James a khel lo a, Oracle Arena-ah Warriors 112-94 in an chak.

June 4, Ninganiah NBA Final Game 1 khelh ṭan a ni dawn a, Oracle Arena-a Western Conference champion Warriors-in Eastern Conference champion Cavaliers an mikhual tur hi a hmuhnawm ang.