UEFA-in FIFA president thlan hun sawn a duh

Europe-a football thuneitu sang ber UEFA chuan tunhnaia eiruk thubuai vanga FIFA chhungkaw buaina avangin vawiin a FIFA president thlanna neih tur chu sawn hlat an duh. UEFA hi nimin khan an ṭhukhawm a, an thutlukna kan hre hman lo.

US Department of Justice chuan Nilaini khan eiruk thubuai vangin FIFA official mi pasarih an man a, FIFA president thlanna vawiina neih tur chu kaltlangpui tho tum nimah se UEFA chuan sawn rih mai ṭha zawkin an hria a ni.

UEFA thuchhuak chuan, "Tunhnaia kan thil tawn hian FIFA chhungkuaah eirukna in bu a khuar ngheh tawh zia a tilang chiang hle a ni," an ti a, FIFA president thlanna neih tur chu lemchanna holam ang maiah a chhuah an hlauhthawn thu an sawi.

Europe khawmualpuia National football federation 53 intelkhawmna UEFA chuan, "FIFA congress neih hmain UEFA hruaitute chu kan ṭhu­khawm ang a, football game hmelhmang tih bawrhban mek hi a hmel engtinnge kan thlak danglam theih ang tih kan ngaihtuah dawn a ni. UEFA chuan FIFA hruaitu kan thlak hi a hun tawh takzet in kan hria a. Chutiang a nih rual chuan kan boruak tawnin a zir loh em avangin FIFA president thlanna kan neih tur hi thla ruk vel tala tih khawtlai nise kan duh em em a ni," an ti.

UEFA-in president thlanna sawn hlat duh mah se Asia khaw­mualpuia football thuneitu sang Asian Football Confederation chuan UEFA hi an thlawp loh thu an sawi a, AFC hi president atana Blatter vote tur chiang sa a ngaih an ni.

Hetiang boruak karah hian FIFA president chuh tur Prince Ali chuan, "Hetiang boruak chhe tak nen chuan FIFA hi a kal reng thei lo ang," tiin FIFA hruaitu ṭhenkhatin eiruk thubuai an awrh chu pawi a tih thu a sawi.

A dinna ngaiah FIFA ding nghet

US court-in FIFA hruaitu engemawzat thubuai a siamsak hnu lawkah Swiss court-in 2018 World Cup leh 2022 World Cup thlengtu thlan dan chungchang an chhui zui tur thu an sawi nghal a, FIFA erawhin 2018 leh 2022 World Cup thlengtu tur thlannaah dan lo anga thil tih engmah a awm loh thu an puang ve thung.

Khawvel footballa thuneitu sang ber FIFA chuan pawl chhungkuaa eiruk thubuai awm anga sawi chhuichianna chu an thlawp tlat thu sawiin, eiruk leh thamna sum lak chingte tan FIFA-ah hmun a awm loh thu an sawi a, 2018 leh 2022 World Cup erawh rua­hman sa anga a thleng tur pangngai in an thlen tur thu an sawi.

FIFA Independent Ethics Committee chuan official 11 chu an hna aṭanga an chawlh tir thu an sawi bawk. FIFA president Blatter chuan, "Eirukna a inhnamhnawih ṭhin tan football-ah hmun a awm lo a, chutiang ti ṭhin mi te chu FIFA chuan a hrem zel dawn a ni," a ti.

Hetihlai hian FIFA thawhpui company ṭhenkhat chuan FIFA an thawhpuina an enfiah mek thu an lo sawi ve bawk a, heng company ho zinga lian ber pawl financial service lama lar Visa chuan tunhnaia FIFA buaina avang chuan an zah thu leh mualpho thlak an tih tak zet thu an lo sawi ve bawk.

Visa thuchhuak chuan, "FIFA hnenah an kalphungte zirchiang a, insiamṭha turin kan hriattir tawh. Kan duh anga hma an la lo a nih chuan sum leh paia kan ṭanpuina zawng zawng te hi kan hnukdawk leh vek dawn a ni," an ti.