Newcastle training-na hmun an khar

Newcastle United training ground Darsley Park chu Thawhṭanni khan khar a ni. Premier League club-in an training-na hmun an khar chhan hi an player leh hna thawktu zingah coronavirus kai an awm vang a ni.

Magpies manager Steve Bruce chuan a player pathum leh hna thawktu pakhatin hri an kai thu hi a sawi chiang a, midang pawh endik tur niin hri kai hi an la pung mai thei niin a sawi bawk.

Kar hmasa Zirtawp zan khan Newcastle hian Crystal Palace chu 2-0 in an hneh a, he inkhelah hian captain Jamaal Lascelles, winger Allan Saint-Maximin leh forward Andy Carroll te chu damlohna vangin an inlan thei lo a, defender Emil Krafth a hliam bawk a ni.

Premier League thuneitu lam chuan tun kar chhungin hri kai thar mi 10 an awm thu an tarlang a, hri kaite hi khawi club leh player nge an nih tih erawh tarlan a ni lo - Newcastle player erawh an awm ngei tih a chiang.

Tun season league match 10 an khelh tawh chinah Newcastle hian point 14 hmuin 13-na dinhmun an luah a, an chunga awm Leeds United nen an point hmuh a inzat. Bruce-a naute hian tun kar Zirtawp zan hian Aston Villa an lenchilh dawn a, Covid-19 boruak a zirin inkhel lo thei dinhmunah an ding.