Balotelli-a'n Liverpool chhuahsan a tum lo

Liverpool striker Mario Balotelli agent Mino Raiola chuan Italian striker Balotelli chuan Liverpool a chhuahsan loh tur thu a sawi.

Kum 24-a upa striker hian AC Milan aṭangin nikum khan Liverpool hi a zawm a, a man atan Reds hian pound maktaduai 16 lai an seng. Mahse, beisei angin Manchester City striker hlui hi a che ṭha tawk lo a, Liverpool tana a season hmasa berah Premier League goal khat chiah a khung. Hetiang tehnuaih a nih avang hian Liverpool chuan an striker hi chhuah tir mai an hnial lo nia sawi a ni.

Mahse Balotelli agent Raiola chuan he thu hi pha in, "Liverpool nen inbiakna kan kalpui a, Mario hi he hmuna la cham turin an duh a ni. Ka ngaihdan chuan Mario hian he club khelh dan phung hi a man ṭan mek chauh a ni. Brendan Rodgers-a ngaihdan chu ka sawi thei lo a, ka ngaih­danah erawh Mario hian hma a sawn hret hret a ni," a ti.

January thla khan Li­verpool manager Rod­gers chuan Balotelli chu club khelhphung man tura training na lama a thawhrim lehzual a pawimawh thu a lo sawi tawh a ni.

Raiola chuan, "Club nen inbiakna kan nei reng a, Anfield lam pawh Mario hmasawnna leh khelh dan avangin an lawm a ni. Mario hian tun aia nasa zawka hmasawn a ngai tih hi ka pawm a, kuminah hian a che ṭha ngei ang tih pawh ka ring tlat a ni," a ti.