Walcott leh Wilshere te dinhmun chiang lo

Arsenal manager Arsene Wenger chuan a player inhliam dam hlim pahnih Theo Walcott leh Jack Wilshere te chuan Inrinni zana FA Cup final Aston Villa nen an khelh hunah inkhel bul an ṭan dawn leh dawn loh a chian loh thu a sawi.

Tun season Premier Lea­gue match hnuhnung ber Arsenal-in an khelmual Emi­rates stadium a an khelh ṭum khan England international pahnih hi an khel ṭha hle a, mah se heti chung hian Gunner manager chuan FA Cup final-ah inkhel bul an ṭan ngei ang tih a sawi thei lo.

Inrinni kalta zana West Brom nen an inkhelh ṭum khan a hliam dam hnua a vawi khat nan Walcott-a'n inkhel bul a ṭan a, hat-trick siamin a team-te a chak pui chiang hle. A ṭhianpa Wilshere pawh kerekna vanga hun rei tak a inkhel theih loh hnuah khelmualah inlanin goal khat a khung ve bawk.

French manager Wen­ger chuan, "Tunah chuan FA Cup final khel tur hi ka chiang thei mai lo, vawi hnih khat chet fuh vanga champion nomawi hi chawi mai theih a ni lo a, season tluana chet ṭhat a ngai. Player ṭha tak tak awmkhawm kan nih avangin a lut tur pawh thlan a harsa hle ang. Final boruak sangah chuan mi pawimawh bikin danglamna an thlen theih ṭhin avangin chutiang mi tur chu thlan chhuah kan tum ang," tiin a sawi.

Karleh hian Arsenal leh Walcott hian contract chungchang an sawi fel tura rin a ni a, Walcott hian a contract a pawtsei lo a nih chuan Arsenal hian Liverpool aṭanga chhuak mai tur Raheem Sterling lam an hawi dawn niin a lang.