Hma hun chiang lo El Shaarawy
AC Milan striker Stephen El Shaarawy chuan season thara a khelhna tur a la ti chiang lo. Premier League lamah a kal dawn niin a agent leh unau ni bawk Manuel chuan a sawi.
Premier League-a pathumna Arsenal leh Liverpool-in he Italian striker hi an thlithlai mek. Kum 22-a upa striker hi hliam vangin January thla aṭang khan khelmuahah a inlan lo vang vang a, Inrinni a Milan leh Torino inkhelh ṭum khan lo kir lehin goal hnih a rawn thun leh nghal nghe nghe.
Italy international Shaarawy hian kum 2011 aṭang khan Milan hi a zawm a, a club tan hian match 82 khel tawhin goal 21 a khung tawh. Kum 22 chauha upa ala nih avangin club lian tam takin an duh hle.
El Shaarawy-a unaupa leh a agent ni nghal bawk Manuel chuan, "Ka unaupa hi Milan-ah kum li chhung a cham tawh a, hetih chhung hian kawng hrang hrangin hma a sawn hlein ka hria. Club lian ṭhenkhatin lakluh an duh ngei a, Premier League-a kal theihna hun ṭha pawh a nei ngei dawn niin a lang. Mahse, a khelh mekna club thuneitute nen a hmalam hun chu an la ti chiang ang chu. Milan hmalak tum dante, club kal zel dan turte ngaihtuah hmasain mimal hun hman dan tur chu a chiang chauh ang," tiin a sawi.
Shaarawy hi Savona rama piang a ni a, apa chu Egyptian niin anu chu Italian a ni thung. Muslim sakhaw betu a ni a, anu ram Italy tan hian match 11 khel tawhin goal khat a khung ve tawh bawk.