Baines a lo kir hnai

Everton defender Leighton Baines chuan season thar Premier League ṭan hmaa a inkhelh leh ngei theih a rin thu a sawi. Pre season training-ah a ṭhiante a zawm theih a inbeisei.

England international Baines hi tun thla tir khan a kerek na avangin an zai, a khup leh malpuiah hliam a neih bawk avangin tunah hian inkhel theiloin enkawl mek a ni.

August thla hmaa inkhelh theih beisei Baines chuan, "Nitin mai hian hma ka sawn ve zel a, tunah chuan ball boot pawh ka bun leh thei tawh. Mahse, inkhel tur chuan ka la inpeih chiah lo. Ka kerek an zai hun hi a fuh hlein ka hria, season tluanin min tibuai deuh reng a, ka tuar lui deuh hram hram ṭhin. Inkhelh tur tam loh leh taksa hahchawlh theih deuh laiin min zai a, ka hriselna a ṭhat bawk avangin ka ṭha chak hle. Season tharah chuan dam takin ka inkhel thei tawh ngei ang," tiin a sawi.

Tun season-ah Everton hian beisei angin an khel lo a, point 47 hmuin table-ah 11 na an ni. Europa-ah pawh beisei phak loin semifinal an inhlangkai zo lo.