Mayweather vanga buai lo Khan

Vawiina American boxer Chris Algieri nena inhnek tur Bris­tish boxer chhuanvawr Amir Khan chuan a ngaihtuahna chu May­weather lamah niloin a inhnek pui tur Algieri lamah a pek thu a sawi.

Vawi hnih world champion lo ni tawh Amir Khan hian May thla tira khawvel ngaihven inhneka Manny Pacquiao hnehtu Floyd Mayweather hnek leh tura mipui rinkai ber zinga mi a ni.

Kum 28-a upa Amir Khan chuan, "Tunhmain kan inhnek tur aia a hnua midang ka hnek tur ka ngaihtuah zawk avangin ka lo tisual tawh a, thlen nawn tir ka tum lo. Tuna pawimawh ber chu vawiina kan inhnek tur hi a ni," a ti.

Amir Khan nena inhnek tur Algieri hi WBO light wel­terweight champion hlui niin vawi 21 inhneka a tlawmna hmasa ber chu Pacquiao kutah a lo tuar tawh nghe nghe.

Bolton khawchhuak Khan chuan, "Ka inhnek pui tur chu Algieri a ni a, a inhnek dan ka zirchian mek leh ka thlithlai ber pawh Algieri a ni. Tun hi Mayweather emaw Pacquiao ngaihtuah hun a ni lo," a ti.

Amir Khan hian langsar takin May­weather a lo cho tawh ṭhin a, Sep­tember thlaa Mayweather-a'n boxing a chawlhsan hma ngeia American boxer hneh loh la tawng lo chu tukdawl a chak thu a lo sawi tawh a ni.