Europa League champion Sevilla

Sevilla-in Europa League nomawi an chawi a, ṭum li champion thei hmasa ber an ni.

Nilaini zan khan Warsaw-ah Sevilla hian Carlos Bacca goal hnih leh Grzegorz Krychowiak goal hamngin Ukraine club Dnipro Dnipropetrovsk 3-2 a hnehin an champion.

Sevilla hi La Liga-ah pangana ni mah se Europa League champion an nih takah chuan season tharah UEFA Champion League groupstage khel turin an tling nghal ang.

Sevilla hian awlsam takin nomawi an humhim lo a, Dnipro tan Nikola Kalinic chuan minute sarihna lekah hmahruaina goal a tauh lut. Ukraine hian final lut turin match 16-ah vawi sarih chiah an chak a, goal 13 chauh an khung bawk. Tun hi Dnipro-in European competition-a final vawi khat an thlenna a ni a, hma an hruai hma lutuk hian mak tih a hlawh hle.

Spanish club-in siphurh sut tumin an nawr let a, Dnipro tlar hnung erawh an ṭhiat thei lawk lo. Minute 28-naah Sevilla midfielder Ever Banega corner pet chu Dnipro-in an clear thei mai lo a, box chhung tawt tak kara Polish defensive midfielder Grzegorz Krychowiak pet chu a goal chiang hle.

Sevilla-in an siphurh an sut aṭanga minute thumnaah hma an hruai nghal a, Colombia forward Bacca chuan Dnipro keeper Denys Boyko bumin hmahruaina goal a khung. Goal luhna kawngah Arsenal player hlui Jose Antonio Reyes a ṭangkai hle.

Dnipro-in final khelh hma Europa League match hnu­hnung parukah goal khat aia tam match khatah khung lo mah se first half tawp hma hretin Ruslan Rotan freekick hmangin goal hnihna an khung a, halftime-ah 2-2 a ni.

Second half erawh first half boruak nen a danglam tawh a, minute 73-naa Bacca-a'n Spanish midfielder Vitolo ball pek a khung hnuah Dnipro-in comeback turin theihna a nei tawh lo. Sevilla 3-2 in an chak.

Vawi rukah vawi ruk

Sevilla hi final-ah an hriam hle. Kum 2006 UEFA Cup (Europa League awm hmaa inelna hming) final-a Middlesbrough an hneh hnuah Cup final-a an match zawng zawng an chak vek.

Sevilla hian Europa League pali an chawi bakah Copa del Rey title pahnih an la bawk.

Spanish club hian Boro 4-0 a an sawp zawh kumah Espanyol chu Europa League final-ah penalty-ah an hneh a, a kum zawnin an champion. 2006/07 season vek hian Copa del Rey final-ah 1-0 in an chak.

Kum thum chhung an reh a, Nou Camp-ah Atletico Madrid 2-0 in an hneh a, a ṭum nga nan Copa del Rey-ah an champion.

Nikum khan Europa League final-ah Benfica an hneh a, tun ṭumah Dnipro an hneh leh bawk.

High 5ive

Europe-ah Spain an chung­nung a, Valencia-in qualifying stage an paltlang chuan season tharah Spanish club panga ngawtin Champions League an khel thei ang.

Barcelona, Real Madrid leh Atletico Madrid te hi La Liga pakhatna aṭanga pathumna niin Champions League group stage an tling chiang a, Valencia hi palina an ni. Sevilla hi Europa League champion vanga tling an ni.

Kum 10 liamta khan Cham­pions League-a Liverpool champion zarah English club pangain UCL an khel teuh viau a, amaherawhchu Everton-in qualifying round-ah Spanish club Villarreal hneh loin an tla.

Emery a lawm

Sevilla a zawna Europa League chawipuitu manager Unai Emery chuan, "Europa League hi kan ngaina takzet a ni. Nomawi chawi turin theihtawp kan chhuah a, final kalkawng harsat ang zetin final-a kan hmachhawn pawh an awlsam lo. Halftime-ah player-te chu thlamuang taka khel turin ka hrilh a, goal venhim leh goal nawr a pawimawh ve ve tih ka sawi bawk. Europa League kan champion piah lamah season thara Champions League kan khelh dawn avangin ka lawm takzet a ni," tiin a sawi.

Emery chuan sawi chhun­zawmin, "Sevilla-ah hian ka hlim a, kan nomawi hi suppor­ter-te tan a ni," tiin club danga chhuah a tum loh thu a sawi.

Dnipro coach Myron Marke­vych chuan, "Tlar hnungah tihsual kan nei nual a, Bacca kha cheṭha turin kan siam a ni. Keini aiin Sevilla khan tawnhriat an ngah a, chu chu inkhel result-ah a langchhuak ta a ni," tiin an chak loh chhan a sawi.