Xavi hi khawvela midfielder ṭha ber a ni - David Villa

David Villa chuan Barcelona leh Spain team-a a khelh pui ṭhin Xavi chu khawvel midfielder piang tawh zinga ṭha ber a nih thu a sawi.

Kar hmasa khan Barcelona captain Xavi hian a inzir chhuahna Barca chuahsana Qatar Al-Saad a pan tur thu a tichiang tawh. Barcelona playmaker hian Nou Camp-ah kum 17 a cham chhungin champion nomawi 23 tehmeuh a chawi tawh. Spain tan European Championship leh FIFA World Cup-ah a champion tawh bawk.

Kum 2010 aṭanga 2013 chhung khan Xavi leh Villa te hi Barcelona tan an khel dun a, kum thum chhungin champion nomawi pa riat an chawi hman. Heng zingah hian La Liga leh Champions League pawh a tel nghe nghe.

A vanglaia striker hlauhawm ber pawl ni ṭhin, tuna New York City striker Villa chuan, "Xavi nen hian ram tan hun rei tak kan khelh dun bakah Barcelona-ah kum thum chhung kan khel dun tawh. Ani nena team khata kan awm ṭhin kha ka tan chuan a nuamin a hahdam thlak ṭhin hle. A hnathawh tawh zawng zawngte avang hian zah leh chawimawi hi a phu a, ka ngaihdan chuan khawvela midfielder ṭha ber a ni," tiin Xavi chu a fak hle.

Xavi hian Spain tan match 97 khel tawhin goal 59 a khung tawh a. Tunah hian Spain tana goal khung hnem ber a ni mek.