Dortmund-in Lazio mikhual dawn

Champions League group F-ah Borussia Dortmund leh Lazio te an che ṭha a, knockout stage an luh ngei a rinawm. German club hian zanin dar 1:30 hian Italian club hi an mikhual dawn a, group hmahruaitu inchuhna a ni thei ang.

Dortmund hi European team hmuhnawm ber zinga mi an ni a, player beiseiawm an kawl hnem avangin an chanchin an ziak nasa. Norwegian striker Erling Haaland-a'n tun season-ah goal 17 a khung tling der tawh a, heng zinga goal ruk hi Champions League huanga mi a ni. Haaland bakah hian rawlthar duhawm Jadon Sancho, Giovanni Reyna, Jude Bellingham leh Youssoufa Moukoko te an kawl.

Amaherawhchu German club hian an player-te tawnhriat neih tlemna an tuar leh ṭhin a, Lazio hmachhawn tura Stadio Olimpico-a an lenluh ṭumin 3-1 in an tlawm.

Tun ṭumah hian Lucien Favre-a hote hian hneh leh ngei an tum dawn a, an ven fimkhur tur chu Dortmund player hlui Ciro Immobile a ni ang. Italian forward hian season liam ta khan Serie A-ah goal 36 khungin European Golden Shoe a dawng. Tun season-ah Covid-19 vangin Immobile-a'n inlan loh ṭum nei mah se Champions League match hnih lekah goal thum a khung tawh. Simone Inzaghi hote hian Dortmund hi an mual Signal Iduna Park-ah hneh ngei an tum ang.