Advocaat-a'n Sunderland a chhuahsan

Dutch manager hlawhtling Dick Advocaat chuan Premier League-a Sunderland a inhamtan pui hnu in a chhuahsan.

Kum 67-a upa manager chuan club enkawl lamah tuina a neih tawh loh thu a sawi a ni. Division hniam lama tla thei dinhmuna an din lai March thlaa Black Cats zawmtu coach chuan, "Sunderland-ah hian ka hun tawna pawimawh ber pawl ka tawng a ni. Mahse, kan nitin nun hmannaah thutlukna harsa tak kan siam a ngaih chang a awm ṭhin. Kum 68-a upa ka ni ve tawh a, chawlh hahdam hi mamawh ve tawh niin ka inhria a ni," tiin a chawlh chhan a sawi.

Netherlands manager hlui chuan, "Club tam takin an hnena thawk turin min sawm a, mahse ka hnar fai vek. Sunderland-a ka hna ka chhunzawm dawn lo rau rau a nih chuan hmun danga thawh chakna hi ka nei lo a ni," tiin a sawi.

Sunderland chairman Ellis Short chuan, "Kan hnena rei lo te a cham chhungin hna ropui tak a thawk a, a tumruhna leh tawnhriat hmangin kan club tlu tawh min tungding leh a ni. Kan club tana a hnathawh ropui tak avang hian a chunga kan lawmna hi a dai tawh lo ang," tiin hmun hima hruai thlengtu Advocaat chu a fak hle.

Ellis Short chuan Advocaat thutlukna chuan tihnual mah se a thutlukna chu an zah sak thu a sawi.

Dutch coach ropui hian Sunderland-a enkawl hmasak berah West ham lakah 0-1 in tlawmpui mah se match riat chiah khelh tur a awm tawh tihin vawi thum a chakpui a, vawi thum tho an khingpuite inhnehtawk puiin tlak hlauhawma ding kha season thara Premier League khel turin a chhanhim a ni.

Premier League-a an him theihna tura Newcastle United 1-0 a an hneh ṭuma a mittui hial ti tla tu Advocaat hian Sunderland a enkawl hma in club ṭha tak tak a lo enkawl nual tawh.

Kum 1998-2002 inkar khan Scottish club ṭha Glasgow rangers enkawlin league title bakah cup competition-ah vawi hnih a champion pui a, Netherlands lamah PSV Eindhoven chu league title chawipui tawhin Russian club ṭha Zenit St Petersburg chu Russian Premier League-ah a champion pui bawk.

Zenit-a a cham chhung hian Advocaat hi a che ropui hle a, kum 2008 UEFA Cup a chawi pui bakah kum 2009 khan UEFA Super Cup-ah Manchester United hnehin a lo champion tawh bawk.

Netherlands pawh lo enkawl tawhtu hian international level-ah United Arab Emirates, South Korea, Belgium, Russia leh Serbia te alo kaihruai tawh bawk a ni.