FRENCH OPEN Third Round-ah Sharapova leh Federer

French Open hmeichhe champion lai Maria Sharapova chuan a champion nomawi humhim turin kawng dik a zawh zel a, second round-ah a khingpui Russian Vitalia Diatchenko hnehin third round a inhlangkai. Mipa lamah Grand Slam vawi 17 champion tawh Roger Federer chuan third round a lut ve bawk.

World number 2 Sharapova hian minute 81 chung lekin world number 91 Vitalia Diatchenko chu 6-3, 6-1 in a hneh. Philippe Chatrier Court-a inkhelah hian khua lum hle mah se Sharapova hian nidanga a tih ngai loh dan takin kawr ban tlawn a ha a, hei hi a dam loh deuh vang leh vawt a tih vang a nih thu a sawi. Third round-ah US Open champion lo ni tawh Australian Samantha Stosur nen an inhmachhawn leh ang.

Seeded number 2 Federer chuan third round lut turin Marcel Granollers chu straight set-in a hneh bawk. Federer hian Marcos Baghdatis leh Damir Dzumhur inkhela a chak zawk zawk a hmachhawn leh ang.

Second Round inkhelah Federer hian set khatna chu awlsam takin 6-2 in a la mai a, set hnihnaah erawh Granollers a rawn ṭang let ve thei hle mai a, set ala ve mai dawnin lang hman mah se Swiss star zawk hian 7-6 (7-1) in a la zawk. Set hnuhnung berah erawh harsa lo takin 6-3 in Federer-a'n a la zui leh bawk.

Mipa inkhel dangah seeded pali na Tomas Berdych chuan inkhel inhnehtawk takah Radek Stepanek chu 6-3, 6-7(7), 6-3, 6-3 in a hneh hram. Berdych hian inkhel bul a ṭan ṭha hle a, set khatnaah chuan a zawnin game thum a la nghalin harsa lo takin set a la. Set hnihnaah world number 129 Stepanek-a'n rin loh tak maiin 6-7(7) in set a rawn la ve. Mahse set hnuhnung pahnihah erawh Berdych a chungnung chhunzawm leh nghal.

Khawtual tlangval Jo-Wilfried Tsonga chuan hnehna a chang ve bawk a, set hloh loin 6-4, 6-1, 6-1 in Dudi Sela a hneh. Kum 2013 khan Tsonga hian Roland Garros semifinal a lo lut tawh. French Open-ah hian a ram leilung fa zingah chuan Tsonga hi champion thei tura beisei awm ve ber a ni mek.