PSG hmaah United number 7 'Cavani'

Manchester United-in zanin dar 1:30 hian Paris Saint-Germain an mikhual dawn a, Uruguayan striker Edinson Cavani-a'n amah duh lotu French champion a hmachhawn tur hi en a châkawm hle.

UEFA Champions League group H-a team awmte an intluk tawk a, knockout stage luh beiseina an la nei vek. Zanin dar 11:25 hian Istanbul Basaksehir leh RB Leipzig te an inkhel bawk ang.

PSG-in European club lian dangte elpha turin Barcelona aṭangin pound maktaduai 200-in Neymar an lalut a, French club hian Edinson Cavani an kawl sa. Season khatnaaah Cavani-a'n goal 38 a khung a, Neymar aiin goal 10-in a khung tam.

Lionel Messi hliahkhuhna tlan sana Paris pantu Neymar-a'n PSG-ah pawh goal khung tam lamah tluk loh a nei. Season hnihnaah Brazilian forward a tlangnel ṭan a, September thlaa Lyon nen an inkhelh ṭumin Cavani penalty a chuhpui.

PSG-in Lyon 2-0 in hneh zui mah se Uruguayan striker penalty pet chu keeper Anthony Lopes-a'n a dang. Manager Unai Emery chuan, "An pahnih inkarah chingfel rawh se. Cavani leh Neymar te hi pet tura tih ve ve an ni a, puitling takin thutlukna an siam a ṭul. A theih loh a nih chauhin ka inrawlh ang," tiin a sawi.

Nikum February thla khan boruak ṭha lo hi a chhiat belh a, PSG-in Dijon 8-0 a an sawp ṭumin Cavani-a'n penalty pet se club tana goal khung tam ber record a siam dawn. Amaherawhchu Neymar hian penalty pet tura tih a nih angin a pet ta zawk. 

Kum tawp lamah erawh boruak a zia ta deuh. PSG-in Galatasaray 5-0 in Champions League group stage-ah an sawp a, penalty pet turin Neymar-a'n Cavani a kian ta thung. Hriat tel tur erawh hemi ṭum hi chuan PSG-ah Neymar hi a 'thu ber' tawh a, goal khung kawngah pawh Cavani-a'n a tluk tawh lo.

PSG-in Neymar an thlang a, chanvo ṭha an pe. Cavani erawh PSG tan goal 200 khungin club tana goal khung tam ber ni mah se Kylian Mbappe a awm bawk avangin dinhmun ṭha a chang thei ta lo.

Season liam ta tawp rualin Edinson Cavani contract a tawp a, Covid-19 vanga season an pawtsei chung pawhin Uruguayan striker contract hi pawhseisak a ni lo. PSG hian kumin August 12 khan an club kum 50 a tling a, social media-ah player langsarte an pholang.

George Weah, Ronaldinho leh legend rual zingah Neymar leh Mbappe te an tel laiin club record goal scorer Cavani telh a ni lo. Uruguayan striker hian Ligue 1 nomawi ringawt pawh vawi ruk a chawipui laiin telh a ni lo a, French champion hian an hnawl tiha chhal theih a ni.

Manchester United-in Edinson Cavani hi duh reng vanga lalut an ang lo. English club hian duh tak tak ni se PSG-in Uruguayan striker an hnawl khan an la chat ang. Amaherawhchu United hian Jadon Sancho an dawr a, an lakluh theih loh hnuah fans hmai sa pumpelh nan hming langsar Cavani hi an lalut chauh niin a lang.

Cavani hian quarantine vangin PSG nen an inkhelh hmasak ṭumin squad-ah telh a ni lo a, lo dam ta reng pawh ni se inkhel turin a la inpeih lo. Ole Gunnar Solskjaer-a'n Uruguayan forward hi a dam ṭhat hnuah pawh bench-ah a dah a, Instanbul Basaksehir 4-1 a an sawp ṭum chauhin bul a la ṭan.

Amaherawhchu Pathianni zan khan United-in Southam-pton lakah halftime-ah 2-0 in an hnufual a, second half ṭantirhah Cavani rawn lutin assist vawi khat leh goal hnih neiin hnehna a chanpui. Saints lakah hian jersey number 7 ha Cavani hian United number 9 ṭha ber a ni tih a rawn lantir. Uruguayan striker hi a club hlui PSG hmachhawn turin a inpeih a, Ole Gunnar Solskjaer thutluknaah a hmalam hun a awm. 

PSG hi kartawp khan Bordeaux nen 2-2 in an inhneh-tawk a, tun season-ah an la khel ṭha tawk lo. Chutihrualin Old Trafford-ah hnehna an chan chuan season ṭha a ni chho thei dawn a; Neymar, Kylian Mbappe leh Marco Verratti te an neih avangin chak tur pawhin beisei an nei sang khawp ang.

Manchester United-in damloh vangin Anthony Martial an chhawr thei dawn em tih a chiang lo a, Paul Pogba a la inhliam. Amaherawhchu Martial awm lo pawh ni se Cavani bakah Rashford leh Mason Greenwood te an awm bakah Pogba aiah Donny Van de Beek a awm bawk avangin France rama an hneh tawh hi hneh nawn thei turin an ṭha tawk.