Highlander tan Apuia a pui

Thawhṭanni zan Indian Super League inkhelah Indian football-a hriat reng tawh tur thil a thleng a, Mizo rawlthar Lalengmawia (Apuia) chu ISL-a captain ni thei naupang ber a ni. 

NorthEast United hian ISL ṭan hma khan captain pali an neih tur thu a puang a, player langsar leh tawnhriat nei ṭha zingah Apuia hming a tel. Highlander-in FC Goa 1-1 a an inhnehtawkpuina inkhelah Apuia'n captain armband a rawng hreng ta a, kum 20 leh ni 45 mi a ni - Hero of the Match-ah thlan a ni bawk a, Apuia'n November 30 zan a hre reng tawh ang. 

Highlander tan Idrissa Sylla chuan minute 40-naah penalty aṭangin goal hmahruai a khung a, a goal khung hi Seriton Fernandes laka a hlawhchhuah a ni. Kum 29 mi Guinea international hian Kerala Blasters lakah a khung tawh bawk a, tun season-ah goal hnih a khung tling ta der. 

FC Goa tan Igor Angulo chuan minute 43-naah an si phurh a rawn sut a, goal dang erawh lut zui loin team pahnih an inhnehtawk - NorthEast United hian match thum an khelh aṭangin point nga an nei ta a, FC Goa erawhin match thum aṭangin point hnih chiah an la nei thung. 

European top flight football thlenga lo khel tawh ram pawn player leh Indian player tawnhriat nei ṭha karah Apuia chu player langsar ber a ni a, captain armband hreng chungin a talbuai lo.

Vaivakawn rawlthar hi FC Goa goal nawr tur midfield aṭanga chhu chattu a ni a, vawi 26 pass neiin vawi 18-a pass dik a, vawi 41 ball a tawk fuh a, vawi kua ngawt tackle a nei. 

Apuia hi kum 2017-a FIFA Under 17 World Cup-a India tana lo inlan tawh a ni a, World Cup-ah duhsak hlawh tawk lo mah se tunah chuan India U17 World Cup team aṭang khan player langsar ber ang hiala chhal ngam a ni tawh ang. 

ISL-a coach naupang ber, kum 35 mi Gerard Nus-a'n kum 20 mi lek captain-ah hmangin season hmasa league round-a pakhatna Goa-a hmachhawn a, Spanish coach chuan Apuia a rinzia pholanna a nih thu a sawi. 

Liverpool first team coaching staff zingah pawh lo tel tawh Gerard chuan, "Indian player zinga talent nei ṭha ber pawl kan kawl thei hi ka lawm takzet. India Under 19-ah a tel a, senior team tan pawh a la khel thuai ang. Captain armband ka hrentir khan a chunga rinna ka nghahzia a tchiang a ni," a ti. Highlander tan Apuia bakah hian Lalrempuia Fanai chuan inkhel bul a ṭan bawk a, Lunglei tlangval hi Aizawl FC aṭanga NorthEast United zawmtu Rochharzela chuan minute 66-naah a thlak - Chhara hi quarantine vangin a inlan thei lawk lo a, tun hi ISL-a a match hmasa ber a ni. 

Covid-19 vangin tun season ISL-ah entu an awm thei lo a, hetichung hian ṭum dang zawng aiin boruak erawh a 'hot' niin a lang - Goa leh Highlander inkhelah pawh Gerard hi mual sira a din laiin Goa midfielder Alberto Noguera chuan a nam thlu.

Goa coach Juan Ferrando chuan a coach pui tlu lai hi mawi lo takin a lo nuih - a hmain ṭawngkamin an inbei tawh bawk. Gerard Nus chuan, "Ferrando kha kan bench lama rawn kalin a rawn nui hial a, NorthEast United-a thawh ve a châk a ni mai thei," tiin a elpui hi a kap zui!

Ferrando chuan, "Hmaichhanah kan titi tawh a, heng thil sawi zui hi a ṭulna ka hre lo," tiin a sawi thung a, a chet dan erawh a en let pawhin a chhuang lo ang.