Arsenal dinhmun lanna tur FA Cup Final

2015 FA Cup champion turin Arsenal rinkai an ni a, final a nih tlat avangin Aston Villa hlamchhiah theih a ni lo.

Zanin dar 10:00 hian Wembley Stadium-ah FA Cup final khelh a ni dawn. Aston Villa an champion chuan league-ah 17-na ni chungin season tharah Europa League an khel ang. Arsenal an champion erawh chuan Champions League khel tura an tlin tawh avangin League-a pasarihna Southampton-in Europa League an khel thung ang.

Arsenal dinhmun

2004-05 season-ah Arsenal-in FA Cup final-ah Manchester United hnehin an champion a, hemi season hian keeper Manuel Almunia, midfielder Mathieu Flamini leh defender Emmanuel Eboue te an ni a, pound maktaduai thum bawr vel bak an hmang lo.

Nomawi chawi kawngah Arsenal an reh vang vang a, 2011-12 Season-ah champion London club hian champion duhin pound maktaduai 50 bawr vel player lei nan an hmang tawh a, a dawt leh season-ah pawh an pawisa hman zat a tla hniam chuang lo. 2013-14 Season-ah chuan player manto law law Mesut Ozil an la lut a, FA Cup an chawi ta.

Tun season-ah 2003-04 season hnu lama a vawi khatna atan league-ah champion an tum a; Alexis Sanchez, Mathieu Debuchy, David Ospina, Calum Chambers, Danny Welbeck, Krystian Bielik leh Gabriel Paulista te lak luh nan pound maktaduai 93 bawr vel an hmang. Anni aia pawisa hmang tam Manchester United leh Liverpool ten nomawi an chawi loh laia FA Cup champion an nih chuan league champion ni lo mah se season hmang chhia an ni lo ang.

Arsenal midfielder Jack Wil­shere chuan, "League-ah pahnih­na nih kan duh a, kan nih tak loah chuan nomawi chawi chunga season khar kan duh. FA Cup hi season kan hman ṭhat leh ṭhat loh tehna tur a ni," tiin a sawi.

Villa tiphurtu Sherwood

Paul Lambert hoin Aston Villa-in bul an ṭan a, February thla a thlen meuh chuan relegation zone-ah an awm hman. Tottenham Hotspurs manager Tim Sherwood-a hnuaiah Villa an phur thar a, tla thei dinhmuna ding Villa kha Sherwood hian league-ah hmun himah a hruai thleng a, kum 2000 hnua a vawi khatna atan FA Cup final an thleng bawk.

Sherwood luh hnuah Belgian forward Christian Benteke-a'n goal khung hna a chhunzawm a, season ṭantirh match 21-a goal thum chauh khung khan match hnuhnung 12-ah goal 12 a khung. Arsenal tana thu lawmawm loh chu Benteke hian London club a hmachhawn hnuhnung pathumah goal thum a khung.

Benteke hi pound maktaduai 32.5-in lei chhuah theih a ni a, Villa manager chuan an hralhna pawisa aṭanga team tana ṭangkai tur player tam zawk a lak luh theih dawn avangin chhuah a phalsak der tawh. Belgian forward hian club ṭha zawk a hmuh theih nan final-a a chet ṭhat a pawimawh ang.

Villa-in Tom Cleverley, Jack Grealish leh Fabian Delph te an nei a, Gabriel Agbonlahor a dam leh tawh bawk nen Sherwood hian cham­pion pui tham player a nei tih a chiang.

Wenger a buai

FA Cup final-a Arsene Wenger-a buaina hi player ṭha a ngah lutuk vang a ni a, starting eleven thlan kawngah harsatna a nei. April 4 leh May 17 inkar khan Arsenal-in starting eleven ngai league match parukah an hmang a, Wenger-a'n player ngai a hman rei ber ṭum a ni.

Wenger hian keeper-ah David Ospina hman mai a rinawm a, tlar hnungah Per Mertesacker leh Lau­rent Koscielny te inkawpin a sirah Nacho Monreal leh Hector Bellerin te chu awm tura beisei an ni.

French manager buaina tak erawh tlar hmalam a ni. Midfield-ah ṭum dang angin Santi Carzorla, Francis Coquelin, Mesut Ozil, Aaron Ramsey leh Alexis Sanchez te awm ta se Jack Wilshere, Alex Oxlade-Chamberlain, Mathieu Flamini leh Mikel Arteta te hi khel lo tura dah nghawt an harsa hle.

Chile forward Sanchez hian tun season-ah goal 24 a khung a, league-ah goal 16 khungin FA Cup-ah goal 3 a khung bawk. Arsenal innghahna a ni.

Tlar hmaa mal tlat turin Olivier Giroud a awm mai a rinawm rualin West Brom laka hattrick siam Theo Walcott a awm ve tlat avangin a chiang bik lo. Arsenal-in FA Cup aṭanga Manchester United petchhuaktu Danny Welbeck chhawr thei lo mah se tlar hmaah an buai lo ang.

Arsenal hi team ṭha zawk an ni a, amaherawhchu 2011 League Cup final-ah Birmingham an hneh lo a, nikum FA Cup final-ah Hull City extra time-ah an hneh hram a, kumin semifinal-ah Reading extra time-ah bawk an hneh leh bawk. Arsenal hian league-ah Villa hi 5-0 leh 3-0 in sawp mah se champion chianga dah a rem lo ang.