A player pui te'n Suarez an chhan
Uruguay players' union chuan thuchhuah siamin 2014 World Cup-a Italy dfender Giorgio Chiellini a seh vanga international match kua lai khel thei lo tura hrem Luis Suarez hremna chu ennawn a ṭul thu an sawi.
Tunhnaia Uruguay player te'n hetiang thawm an rawn neihchhan hi Nilaini a FIFA official ṭhenkhat eiruk thubuai vanga man an nih vang a ni.
Uruguay players' union legal adviser Ernesto Liotti chuan, "FIFA-ah hlemhletna leh eiruknain bu a khuar ngheh tawh zia tunhnaiah hmuhchhuah a ni a, FIFA hi hetiang tehnuaia bawlhhlawh a lo nih avangin kum rei lote liam ta a an thutlukna leh thu relte kha a rinhlelhawm zo ta vek mai a ni. Tuna Suarez chungchang kan sawiah pawh hian thil dik lo a inrawlh ngei a ni chu kan ti ngam lo a, chutiang bawkin a inrawlh lo tih pawh sawi theih a ni chuang lo," a ti.
Liotti chuan FIFA official eiruk thubuai vanga man zingah Suarez hremna petu FIFA disciplinary committee member leh Venezuelan Football Federation president Rafael Esquivel-a tel thu sawi langin Suarez hremna kha a tih rinhlelhawm lehzual thu a sawi.
Kum 28-a upa Liverpool striker hlui hi Chiellini laka a chet dan avang khan thla li chhung football kaihhnawih thil hrim hrima inhnamhnawih thei lo tur leh international football match kua zet khel thei lo tura hrem a ni. Hremna anga a kaltlang a nih chuan June 11 a Copa America inelnaa Chile nen an inkhelh hunah ram tan a inlan thei dawn lo tihna a ni.