Barcelona mikhual tur Athletic Bilbao
Pathianni zan dar 1:00 hian Copa del Rey champion nomawi Barcelona leh Athletic Bilbao te'n an inchuh dawn. A season hmasa bera La Liga-a Barceolna champion puitu Luis Enrique leh a nau te hmachhawn hi Bilbao player te'n an chak lo ang.
Kum 1983-84 season khan Bilbao hian final-ah Barcelona hnehin Copa del Rey bakah League-ah an lo champion tawh. Hemi hnu hian Bilbao hi an la champion leh lo a, Pathianni zan hian a vawi 24 nan champion leh an tum hle ang.
Tunhma thil
Spain rama club hrang hrang 83 te inelna Copa del Rey hi kum 1903 aṭanga khelh ṭan tawh niin Spain-ah chuan tournament upa ber a ni. Champion hmasa ber chu Athletic Bilbao niin final-ah Real Madrid chu 3-2 in an hneh.
Champion team hian season tharah Europa League an khel thei ṭhin a, champion team hi League table aṭangin Champions League an khel a nih erawh chuan a chak lo zawk hian Europa League an khel thung ṭhin.
Nikum final-ah khan Barcelona hnehin Real Madrid an champion. Real hi he inelnaah hian vawi 19 an champion tawh. Champion ngun ber chu vawi 26 champion tawh Barcelona an ni. Pathianni zan hian a vawi 27 nan an champion leh thei ang ngem tih chu khawvelin a thlir dawn a ni.
Barcelona leh Athletic Bilbao te hi tunhmain Copa del rey final-ah vawi sarih an lo inhmachhawn tawh a, Barca chungnung zawkin vawi nga hnehna an chang. Tun hnai final-a an intawn chu kum 2009 leh 2012 kha niin Barcelona an chak ve ve.
Bilbao hian Barca hi an ngam lo ve hrim hrim a, tunhnai inelna hrang hranga vawi 24 an inkhelh aṭangin vawi khat chiah hnehna an chang. Tun season-ah League match vawi hnihah pawh Bilbao hian an hneh lo ve ve.
Rin kai zawk Barca
An player thlir chuan Barcelona hi chak zawk tur a rinkai an ni a, an sulhnu en pawhin Barca tho hi chak zawk tura rinkai an ni. Lionel Messi chauh pawh hi team ti chak tham leh champion pui tham a nih laiin a kawppui turin Neymar leh Luis Suarez an la nei bawk.
Barcelona attacking trio hian tun season-a inelna hrang hrangah goal 117 teh meuh an khung tawh. Messi bik hian goal 54 a khung tawh. Bilbao manager Ernesto Valverde-a tan chuan anni pathum veng tura a naute remkhawm hi a harsa ve hle ang.
Dam leh hliam
Barca lam hi an dam kim lai taka a ni a, defender Thomas Vermaelen chu a chhawr theih tawh. Striker Suarez-a'n training a zawm tawh bawk avangin Enrique player thlanah harsatna a awm lo ang.
Bilbao tan midfielder Oscar de Marcos chu hliam vangin inlan thei dawn lo mah se midfield-ah Ager Aketxe leh Mikel San Jose an inkawp leh theih dawn avangin a thlemuan thlak deuh anga tlarhmaah Aritz Aduriz a khelh theih dawn bawk avangin Bilbao hi an nep bik lo ang. Striker Aduriz hian tunhnai a game hnuhnung 11-ah goal 10 a khung thei tih hi hriat hmaih chi a ni bik lo.