FA Cup Final, Wembley Stadium leh a dangte
English media ṭhat zarah England club-te knockout hmanga inelna FA Cup khawvelin a ngai hlu a; Spain, Germany leh Italy rama inelna Copa del Rey, DFB Pokal leh Coppa Italia te nen chuan television kaltlanga entu an intam hleih hle.
2014-15 FA Cup hi a vawi 134-na chiah a ni. Tun ṭumah hian team 736 zet an tel a, final-a inkhel tur Arsenal leh Aston Villa te hi sulhnu nei ṭha an ni a, final ngaihnawmna a belhchhah ang.
President ngaihdan
Prince William-a'n Aston Villa a ṭan zawk. A ṭan chhan hi club-in sulhnu a neih ṭhat vang a ni a, a ṭhiante ṭan loh ṭan a duh vang a ni bawk.
Duke of Cambridge hian FA Cup final-ah nomawi a hlan dawn a, Premier League club-ah English tam zawk khelthei tura a duhthu a sawi bawk.
Prince William hi FA president a ni a, FA hotu lu-ah hian kum 1939 aṭang khan British Royal Family member hman ṭhin a ni.
Wembley chungchang
Khawvel stadium ngaihhlut Wembley-ah hian mipui 90,000 an leng a; finalist Aston Villa leh Arsenal ten ticket 25,000 ve ve an chang a, FA Football chhungkuain ticket 20,000 an chang a, Club Wembley-in 17,000 an chang a, ticket 3,000 chu remchan dana hman tura dah ṭhat a ni.
Ticket man hi India pawisa chuan Rs 4900 aṭanga Rs 1,2000 velin a lei theih.
Wembley pitch zau zawng hi 68 metres a ni a, a sei lam hi 105 metres a ni. Arsenal leh Villa te khelmual pitch nen a inang chiah a, pitch len zawng hi UEFA standard size niin England-in Champions League final emaw European Championship emaw thlen an beisei vanga a len zawng hetianga ruahman hi a ni.
Entu an tam
Kum 1923 khan Wembley Stadium sak tharah FA Cup final khelh a ni a, Bolton Wanderers leh West Ham United te inkhel entu zat chiah hriat ni lo mah se mipui nuai thum bawr vel pungkhawm anga ngaih a ni. Wembley Stadium hluiah hian entu 126,000 leng tura duan a ni.
1938 FA Cup final khan stadium-ah entu 93,497 an awm a, TV aṭanga entu zat chu 10,000 bawr vela chhut a ni. 2014 FA Cup-a Arsenal an champion khan stadium-ah entu 89,345 an pungkhawm a, TV aṭang entu zat hi maktaduai 10.5 bawr vela chhut a ni a, kum 76 hnua entu inthlauhna hi a let 100 chuang a ni.
Kum 2007 khan Wembley Stadium thar chu hawn a ni a, ṭhutna 90,000 awmin Barcelona khelmual Nou Camp (99,354 capacity) tih loah chuan mipui len tamna ber a ni.
Wembley-ah hian inthiarna 2,618 zet a awm a, mi 34 zelin toilet pakhat inṭawm ang a ni.
Record nei Ṭha Chelsea
Wembley Stadium tharah kumin Premier League champion Chelsea chu champion hmasa ber an ni a, vawi thum an champion tawh.
Chelsea bakah hian Portsmouth, Manchester City, Wigan Athletic leh Arsenal te an champion tawh a. English club langsar Manchester United leh Liverpool an la champion lo.
Arsenal an ropui
FA Cup hi khawvela knockout inelna upa ber a ni a, kum 1871-a ṭan tawh kha a ni. Arsenal tan tun hi final vawi 19 an luhna chiah a ni a, an champion thei a nih chuan vawi 12 an champion-na tur niin champion ngun ber leh final lut hnem ber record an nei kawp ang.
Tun dinhmunah Arsenal leh Manchester United te vawi 11 ve ve an champion tawh a, Tottenham Hotspurs (Vawi 8), Liverpool (7), Chelsea (7) leh Aston Villa (7) ten an dawt.