FIFA president thlanna neih a ni Blatter vs Prince Ali
Nimin khan khawvel infiamnaa pawl lian ber pawl khawvel football khaikhawmtu FIFA president thlanna neih a ni a, president ṭanglai Sepp Blatter leh Prince Ali bin al-Hussein te inkhingin FIFA hnuaia ram 209 hruaitu te'n FIFA hruaitu tur hi an thlang dawn a ni.
Kum 79-a upa Blatter hi tunhnaia FIFA mualphona avangin bang tur leh FIFA president chuh ve tawh lo tura nawrtu an tam hle. Mahse, kum 1998 aṭanga FIFA hruai hna lo chelh tawhtu hian FIFA siam ṭha theitu tur chu amah chauh a nih thu sawiin a inhnukdawk duh lo a ni.
Switzerland khawpui pakhat, FIFA headquarters in bunna Zurich-ah inthlanna neih hmain Blatter chuan, "Tun hi FIFA-in hun harsa leh khirhkhan kan tawn lai mek a ni a, a hautak hle. Mahse, tuna kan buaina leh harsatna zawng zawng su kiang tur chuan kei lo hi chu an awm lo a ni," tiin a vawi nga nan FIFA president nih leh ngei a tum ruh hle.
Vote neih dan
FIFA hnuaiah hian ram 209 awmin Africa, Europe, Asia, North America, Oceania leh South America khawmual tin te'n federation an nei ṭheuh a ni. Vote ṭhen dan chu:
Africa (CAF) : 54 votes
Europe (UEFA) : 53 votes
Asia (AFC) : 46 votes
North and Central America
(CONCACAF) : 35 votes
OCEANIA : 11 votes
SOUTH AMERICA (CONMEBOL) : 10 votes
Total : 209 votes
Engtinnge vote an thlak?
Vote thlakna neih a nih hmain candidate pahnihte hian minute 15 ve ve thusawina hun an nei a, thu an sawi zawhah hian vote thlakna neih chhunzawm a ni.
FIFA hnuaia ram 209 te'n vote an nei vek a, football ram lian leh te vote neih dan a danglam lo. A awmzia chu ram tenau American Samoa te pawn vote khat an neih laiin football ram lian England pawn vote khat tho an nei.
Vote hi electronic hmanga thlak a ni hran lo a, vote thlak nan lehkha them vek hman a ni.
First round-ah hian vote hmun thuma ṭhena hmun hnih hmu an awm chuan chutiang zat vote hmu thei chu FIFA president-a tlingah puan an ni ang. Hetiang zat vote hmu pha an awm lo anih erawh chuan second-round neih leh a ni anga, vote hmu tam zawk zawk chu chak zawkah puan tawp tur a ni dawn a ni.
Vote thlak dan, vote chhiar leh kalpui dan zawng zawng hi FIFA secretary general Jerome Valcke awpna hnuaiah endik tura ruat te'n a endik leh chhiar hnate an thawk dawn a ni.
Tunge Prince Ali?
Jordan lal King Hussein leh Queen Alia te fapa niin England-a Sandhurst military academy chhuak a ni a, Jordan ram sipaiah a ṭang ṭhin.
Kum 39-a upa Prince Ali hi FIFA vice-president naupang ber niin Fifa executive committee-ah pawh ani aia naupang an awm lo. FIFA president a nih theihna tur atana a tlangaupui ber chu football game zahawmna humhim changte leh hnathawkte chhawr dan duhawm zawk tih te a ni.
FIFA official zinga ual au taka 2018 leh 2022 world cup thlen dan chungchanga eirukna a awm leh awm loh report siam tura nawr ṭhintu zinga mi a ni. Football match enna a Muslim hmeichhiate an hmai khuh hman phalsak an nih lohna dan hlip tura tha thawhhlawk ber zinga mi a ni bawk.
Thlawptu neih dan
Asian Football Confederation (AFC) leh Confederation of Africa (CAF) chuan Baltter an thlawp tur thu an lo sawi tawh a, he confederation pahnih hnuaia member tam zawk chuan Blatter hi an vote tura ngaih a ni.
Europe khawmualpui football thuneitu sang UEFA chuan Prince Ali an thlawp thung a, UEFA hnuaia ram 54 zinga 46 tal chuan Jordan prince hi an vote tura ngaih a ni.
North America (CONCACAF) leh South America(CONMEBOL) khawmualpui pahnihin an thlawp lam an puang lo. Mahse, hun rei tak chhung Blatter lo thlawp tawh ṭhin khawmualpui an nih avangin Blatter hi an vote tura ngaih a ni a, report ṭhenkhat chuan tunhnai boruak vangin heng khawmualpui zinga ram ṭhenkhat chuan Prince Ali hi vote an tum thung nia sawi a ni.
Blatter-a'n hnehna chang ta se...
Europe khawmualpui football thuneitu sang ber UEFA chuan Blatter hi a tling nawn leh a nih ngat chuan na taka hmalak an tum.
UEFA hnuaia member 20%-in an hmalak tumna hi an thlawp a nih chuan thla thum chhungin meeting an nei anga, an thurel tur hi a hrawl hle ang.
Blatter hi a tling leh a nih ngat chuan he committee neih tur hian FIFA hnuai aṭanga inlak hran leh World Cup te hial khelh loh an tum dawn nia sawi a ni.
Scottish Football Association chief Stewart Regan chuan, "UEFA chuan Blatter a tlin leh palh tak hlauha kan hmalak dan tur zawng zawng kan duang lawk vek tawh a ni," a ti.