Group hmahruaitu inchuhna Zanin dar 1:30-ah Sevilla Vs Chelsea

Estadio Ramon Sanchez Pizjuan-ah Sevilla-in zanin dar 1:30 hian Chelsea an mikhual dawn. Team pahnih hian point 10 ve ve hmuin Champions League knockout stage an lut tawh a, group hmahruaitu inchuhna a ni ang.

Blues hian kartawp khan Tottenham Hotspur an hmachhawn a, goal awm loin an inhnehtawk. Blues hian Pathianni zanah Leeds United an mikhual dawn a, Frank Lampard-a'n Premier League a ngai pawimawh a nih chuan Sevilla nen player ṭha ṭhenkhat a awltir a rinawm.

Stamford Bridge-a an intawn hmasak ṭumin goal awm loin an inhnehtawk a, hemi a nih avang hian goal awma an inhnehtawk a nih chuan head to head-ah English club dinhmun a ṭha dawn. Goal awm loin inhneh-tawk pawh ni se Lampard-a hote goal difference a ṭhat avangin pakhatna an nih tho rinawm a, hemi a nih avangin group E hmahruaitu ni turin Chelsea dinhmun a ṭha zawk.

Chutihrualin Sevilla hian tun hnai inelna hnuhnung pangaah hneh loh an tawng lo a, English club an hmachhawn hnuhnung pasarihah chak loh an nei lo bawk. Los Nervionenses hian Covid-19 positive vangin keeper Bono chhawr thei lo mah se season liam taa inhliam vanga inlan mumal lo Czechoslovakia keeper Tomas Vaclik a dam ṭha tawh. 

Liverpool player hlui Suso-a inhliam vangin dinhmun chiang lo mah se Lopetegui-a chhawr turin Oliver Torres, Luuk de Jong, Lucas Ocampos, Oscar Rodriguez, Oussama Idrissi leh Youssef En-Nesyri te an dam ṭha. Chelsea tan pawh player tah hriamna hun ṭha a ni a, kartawp khan Christian Pulisic a rawn let a, American star tan match fitness neih nan a pawimawh ang. Germany international Kai Havertz pawh ngai awh turin a inlan a rinawm a, Olivier Giroud erawh bul ṭantir a nih loh chuan France tana Euro C'ship khel turin January thlaa chhuah duhna rilru a len sawt a rinawm.