A vawi ruk nan MotoGP
Pathianni hian tun season-a a vawi ruk nan MotoGP intlansiak chu Italy-a Autodromo del Mugello tlankawngah an tlan leh dawn.
An intlansiakna tur tlankawng Mugello hi Italy-a Tuscany khaw daia awm niin tunlai thiamna hmanga changkang taka cheibawl a ni. A tlankawng thui zawng hi 5.2 km niin 14 m a zau a ni thung. Kawng kawi 15 awmin vei kual paruk awmin a dang pakua chu ding kual a ni thung. Kawng ngil thui lai ber chu 1141m a thui a nih avangin Bike chak ṭha tan chuan dinhmun siam ṭhatna tham a ni ang.
MotoGP world Champion Marc Marquez chuan Pathianni a Italy Grand Prix an tlan tur chu a harsat a rin thu leh intlansiak hautak tak a nih a rin thu a lo sawi tawh. Tun season intlansiak hmasa pahniha hnehna chang thei, mahse tunhnai intlansiak pathuma hnehna chang zo lo Valentino Rossi te ram a nih avangin mipui ngaihven ber tur chu Rossi a ni leh ang.
Yamaha rider Rossi hi an ram anih avangin chak tura rinkai a ni a, he tlankawngah hian vawi sarih hnehna lo chang tawhin ani aia hnehna chang tam an la awm lo. Amaherawh chu nikum khan Repsol Honda rider Marquez chu heliai hmunah hian pakhatna niin World Champion a ni zui bawk.
Italian Rossi hian kum 2002-08 chhung khan a zawnin helai hmunah hian hnehna alo chang tawh a ni. Tunah hian World championship-ah point 102 hmuin hmahruaitu a ni a, pahnihna chu point 87 hmu mek tu Jorge Lorenzo a ni.