Pathianni zanah I League 'final'

I League match tawp berah Mohun Bagan leh Bengaluru an inkhel dawn a, champion tur zawnna a nih avangin 'final' hming vuah atana mawi a ni.

Inkhel hi Pathianni zan dar 7:00 a ṭan tur a ni a, Ten Sports-ah live a pekchhuah a ni ang.

Kum 2007 aṭangin I League hi ṭan a ni a, Kolkata club zingah champion an la awm lo. Hma hruai mektu Mohun Bagan-in hun ṭha an nei a, Bengaluru aia point an hmuh san zawk avangin champion turin point hmuh hrim hrim a tawk. Champion lai Bengaluru tan I League champion zawn hmasa ber ni turin chak a ngai a, an khelmual Kanteerava Stadium-ah an khelh dawn avangin beisei an la nei sang hle.

February 20 khan Salt Lake Stadium-ah Bengaluru-in Sunil Chhetri hmangin minute riat lekah hma hruai mah se Mohun Bagan-in Sony Norde goal hnih bakah Balwant Singh leh Yusa Katsumi te goal khat ve ve hmangin I League champion lai hi 4-1 in an sawp.

Haiti forward Norde hian Bagan match hnuhnung pahniha Royal Wahingdoh leh Sporting de Goa an hneh ṭumin goal a khung ve ve a, tun season-ah goal kua a khung tawh. Hetihlai hian India captain Chhetri erawh Bengaluru tan a che ṭha hran lo a, Dempo lama khelh ṭhat loh avangin AFC Cup-a South China an hneh loh ṭumin bench-ah a ṭhu. Bagan nen erawh inkhel pawimawh a nih avangin starting eleven a chan ngei rin a ni.

Bagan an inpeih

Mohun Bagan-in tun season-ah foreigner leh Indian player an chawlh pawlh ṭha a, season ṭan tirh phat aṭangin champion tura rinkai an ni pha a. Bagan supporter-te pawhin, "Tun season-a an champion loh chuan engtikah mah an cham­pion tawh lo ang," ti khawp­in an club chungah rinna an nghat.

Bagan forward Jeje Lalpek­hlua chuan, "Player-te pawhin tun baka I League champion-na hun ṭha hi a thleng leh zen zen dawn lo tih hriain practice-naah pawh khelh ngei tumin theihtawp kan chhuah. Draw chauh pawhin champion thei mah ila Bengaluru hi team

ṭha an ni a, tihsual a hlauawm khawp mai," tiin a sawi.

Mizo tlangval Jeje hian inhliam vangin tun season-ah a inlan tam lo a, amaherawhchu a dam ṭhat leh tawh avangin starting eleven chan ngei a inbeisei. Bagan forward chuan, "Suppporter-te pawhin kan inkhel tur hi an la thu tak khawp mai. Kolkata aṭangin inkhel en turin an zin dawn. Mak tak chu club dang pawhin min ṭan em em a, an supporter-te hnen aṭangin duhsakna kan dawng nual bawk. Kolkata-a I League nomawi chawi luh hi kan duh tlang vek a ni," tiin a sawi a, Hnathial tlangval hian Mizoram mipuite ṭawngṭaipuina a ngen tel bawk.

Bengaluru an zam lo

Champion lai Bengaluru hi I League club zinga inrelbawlna nei felfai ber an ni a, East Bengal coach Eelco Schattorie pawhin India ram club dangte pawhin Bengaluru hi entawn turin a fuih hial.

Bengaluru player-te hian training-naah GPS an ha vek a, hemi hmang hian training laia player-te awm dan zawng zawng a hriat vek theih. Ei leh inah an fimkhur a, dressing room boruak nawm theih nan hlate an ngaithla ṭhin bawk. Tin, coach Ashley Westwood hian discipline nei ṭha leh che ṭha tluang a ngai pawimawh hle.

Bengaluru hian tun season-ah AFC Cup an khelh tel bawk avangin team dang aiin match an nei tam a, chutichung chuan champion thei dinhmunah an ding. Westwood team-ah hian Mizo player pathum Lalthuammawia Ralte, F. Lalchhuanmawia leh Beingai­chho Beikhokhei te chu player pawimawh an ni.

Keeper Thuama chuan, "Mohun Bagan nen hian theihtawp kan chhuah a ngai a, history siam thei kan ni tih kan chian a ngai. Engkim kan kutah a awm a, kan champion thei a ni," tiin tun season-a Bengaluru tana khel kim vek chuan a sawi.

Bengaluru wing back Chhuantea chuan, "Mohun Bagan hi team ṭha tak a ni a, amaherawhchu kan khelmuala khel tur kan ni. Chak kan tum ruh takzet a, result chu Pathian thu thu a ni," tiin Aizawl FC midfielder Rohmingthanga nau chuan a sawi. Lengpui tlangval hi India tana khel thei tur hming puan chhuah zingah telh a ni.

Bengaluru winger Beia chuan, "Nikuma I League leh kumina Federation Cup kan champion khan Goa-ah ve ve nomawi kan chawi a, mahni khelmual ngeia champion chu a nawm dan a dang khawp ang. Kan team hi ṭha rual a, tupawhin starting eleven chang se kan chhiat phah lo ang. Inhliam kan nei lo a, champion turin theihtawp kan chhuah ang," tiin a sawi. Saiha tlangval Beia hian South China an khelh ṭumin starting eleven-ah Sunil Chettri a luah lan.

I League aṭangin team pakhat an tla dawn a; Sporting de Goa, Shillong Lajong, Dempo leh Bharat FC te chu tla thei vek an ni.