Mipa champion rinkai pathum an chak zel

French Open-ah champion tur a rinkai Rafael Nadal, Novak Djokovic leh Andy Mu­rray ten an khingpui ṭheuh hnehin third round an lut.

Rafael Nadal chuan French Open-a a vawi 68 chakna turin second round-ah a khingpui Spaniard Nicolas Almagro chu 6-4, 6-3, 6-4 in a hneh. A vawi 10 nan a champion tum Nadal hian third round lut turin harsatna a tawk lem lo a ni.

World number 1 Novak Djokovic chuan inkhelh laiin a taksaah harsatna tawk deuh mah se Luxembourg tennis star Gilles Muller chu 6-1, 6-4, 6-4 in a hneh bawk. Set hnihna an khelh laiin Djokovic hi a ṭhal na vangin hun rei vak lo chhung chu enkawl a ngai hial.

Serbian star Djokovic chuan a hliam chaun harsatna a siam sak loh thu leh third round a Thanasi Kokkinakis nen an inhmachhawn hunah pawh harsatna a siam sak a rin loh thu a sawi.

A vawi khat nana French Open champion nih tum Djokovic chuan, "Ni dang ai in boruak awm dan a nuam zawk a, ka tlan kual nasain ka tawlh nasa a, chuvangin ka ṭhal dinglamah harsatna ka tawh phah a ni. Mahse, chutianga na tak a nih lem loh avangin ka inkhel min ti buai lem lo," tiin a sawi. Djokovic hi French Open nilo Grand Slam-ah chuan a champion vek tawh a ni.

Third round lut tur­in Britain Andy Murray chuan fiahna a hma­chhawn nghal a, clay court-ah a zawna vawi 12 hnehna chang turin Joao Sousa chu darkat hnih leh minute 30 chhungin 6-2, 4-6, 6-4, 6-1 in a hneh.

British number 1 Murray chuan, "Ka khelh ṭhat ber ṭum chu a ni lo. Ka ball vuak leh ka inkhel hrim hrim kha a muang deuh vek a, ka vanneih hlauh zawk a ni. Set hnihnaah phei kha chuan ka talbuai hle tih a lang vek a, ka service a ṭhat tawk loh avangin inklhel kha ka thunun thei lo a, set hnuhnung pahnihah erawh ka duh angin ka khel thei e," tiin a sawi.