Liverpool khelmualah hliam tuar City

Premier League leh Champions League-a hmahruaitu chu Liverpool an ni a, Arne Slot-a team hian vanglai an chen mek - Real Madrid coach Carlo Ancelotti phei chuan, "Europe-a team ṭha ber" tiin Liverpool hi a fak hial a, tum an châkawm lo.

Anfield-a lenluh a châkawm loh vanglai takin leng tur pakhat an awm a, an hming chu Manchester City a ni! Zanin dar 9:30 hian league hmahruaitu Reds an lenchilh dawn a, hliam tuam damna tur zawng mek an nih avangin a awlsam lo ang tih a chiang.

City hian Pep Guardiola hnuaia an hun tawn thim ber ang hiala chhal ngam an tawng mek a, inelna hrang hranga an match hnuhnung parukah an chak zo tawh lo. Pep meuh pawh a rilru a chavai a, chhuanlam a van a, hawina tur lam a hre lo.

Hetiang boruak tawn kara Liverpool lenchilh hi City fans tan ṭawngṭai chhannaa pawm thiam a harsa ang tih a chiang a, chutihrual chuan Anfield-a Liverpool an hneh thei a nih ngat chuan beiseina a sang lehzual ang.

A har dawn

Kum 2022-23 season-a City treble champion puitu, khatihlaia an captain Ilkay Gundogan chuan, "Sawifiah ngaihna ka hre lo," tiin tuna City buaina chungchang a sawi a, Liverpool laka an tlawm a nih ngat chuan point 11 ngawtin an thlau tawh dawn bawk.

Gundogan chuan, "Point 11 chu a zau lutuk ang," a ti a, an tlawm chuan an tan nomawi beiseina a thamral tur thu a sawi. City boss Pep pawhin, "Gundogan thusawi ka pawmpui a, a harsa tawh dawn a ni," a ti a, a tawi zawnga sawi chuan City tan Anfield-ah chak ngei ngei a ngai!

Mahse, chutiang tur chuan Erling Haaland-a'n goal khung khawl a nihna a pholan a ṭul dawn a, chumi rual chiaha pawimawh chu tlarhnung phui a ni - Feyenoord lakah Haaland hian goal hnih a khung a, 3-0 ngawta hma an hruai hnuah Dutch club hi si phurh an sut zawhtir a, an talbuai takzet.

Tun hnaia chesual ngun tak Joško Gvardiol insiamṭhat a ṭul a, kum 34 mi ni ve tawh Kyle Walker, Rúben Dias leh Manuel Akanji te pawhin insiamṭhat an mamawh - City hian league match 12-ah goal 17 ngawt an chhuah tawh!

Hei le Liverpool

Arne Slot-a hnuaiah Liverpool-in beisei phak baka ṭhain season an hmang mek a, an tan tun lo liama City mikhualna hun ṭha a awm chuang lo - City an hneh chuan point 11-in an tlansan dawn a, an hmaa inchhawp hi nomawi ang hialin Reds player-ten an ngai ang.

Mi tam takin tun kar hi Liverpool fixture hautak ber ang hialin an ngai. Mahse, buaina thlen tura ngaih Real Madrid chu harsatna nei loin, 2-0 in an hneh a, City an hmachhawn hmaa intihphur nan Spanish champion hi an lo hmang.

Mohamed Salah-a'n Real lakah penalty hlah mah se, ngaihthah chi a ni lo a, Luis Diaz, Cody Gakpo leh Darwin Nunez te ho an awm bawk avangin tlarhnung nghet lo City tan a harsa dawn tih a chiang a, Anfield-ah Reds-in hnehna hlado chham an tum ang.

Real lakah Ibrahima Konate-a'n hliam tenau a nei a, City a hmachhawn thei lo a nih chuan a aia lut turin Joe Gomez a awm a, Conor Bradley pawh inhliam mah se, Trent Alexander-Arnold a dam tawh - tun hnaia hliam langsar dang sawi tur a awm lo a, Liverpool-in point thum an mitthla dawn.