Amorim hote an chak, Arsenal hmain Everton
Manchester United chuan Europa League-ah match zawnin an chak a, Ningani zan khan Noregian club FK Bodo/Glimt chu 3-2 in Old Trafford-in an hneh.
Ruben Amorim hote hian an mual Old Trafford-ah Premier League match an khel chhunzawm dawn a, December 1, Pathianni zan dar 7:00 hian Everton an hmachhawn dawn. Toffees zawh hian Arsenal nen Emirates Stadium-ah December 4, Nilaini zan dar 1:45-ah an inkhel lehnghal ang.
Risk la ngam Amorim
Man United tan Ruben Amorim a hlawhtling dawn em tih la hriat lo mah se Portuguese manager hian hlawhtling tumin risk a la ngam dawn tih a lang.
Ipswich Town laka hnehna an chan zawh loh hnuah Amorim-a'n starting elven aṭangin player paruk ngawt a thlak.
Thla 18 chawlh hnuah ke vei lama pet Tyrell Malacia a rawn let a; Antony, Mason Mount, Lisandro Martinez, Manuel Ugarte leh Rasmus Hojlund ten bul an ṭan bawk.
A goal hma, mahse
Man United-in bul an ṭan ṭha leh a, minute khat pawh tling loah Bodo/Glimt goalkeeper Nikita Khaikin ball chan lai chu Hojlund-a'n nang hmanin Alejandro Garnacho-a'n goal ruakah a khung.
Norwegian club an hnual phah lo a, goal an chhuah hnuah an goal bawh a na sawt emaw tih mai tur a ni. Minute 19-naah Sondre Brunstad Fet-a'n box chhungah ball changin a ball pek chu Hakon Evjen-a'n goal kilah tak a pet lut.
Minute 23-naah Philip Zinckernagel-a'n mual dinglam aṭanga ball la lutin Malacia a tlan pelh hnuah goal ṭha a khung. Mikhual Bodo/Glimt-in 2-1 in hma an hruai ta zawk.
Hojlund leh Onana
Man United pawh manager thar hnuaia khel an ni a, an hnual mai lo. Minute 45-naah Noussair Mazraoui cross chu Hojlund-a'n defender pahnih kar aṭangin a khung. Danish striker hian a ke vei lama ball la perin a kang lai chu a ke dinglamin a khung a, a class takzet!
Halftime-ah Amorim-a'n player-te thu ṭha a hrilh a, second half-ah pawh an nung nghal hle. Manuel Ugarte ball pek chu Hojlund-a'n minute 50-naah tlawh lut a, Old Trafford-ah thawm a ṭha hle.
Man United-in transfer bazar an hmang chhe lo tih a lang a, Mazraoui leh Ugarte te an ṭangkai chho dawn tih a lang. Chutihrualin United khel erawh a nghet lo a, 3-2 a hma an hruai hnuah pawh inkhel an thunun thei lo.
Bodo/Glimt-in United tlarhnung an tibuai a, Onana-a'n United a chhanhim. Cameroonian keeper hian box pawnah tlan chhuakin goal khung thei dinhmuna ding Bodo/Glimt player a tibuai hman a, injury time-ah freekick ṭha takin a dang leh bawk.
Amorim a hlim
Old Trafford-a Amorim hnuaia an match hmasa berah Man United an chak a, Portuguese manager a hlim. Amorim chuan, "A hmasa berah chuan stadium-a mipui awm zatve khan min hre tak tak lo. Portugal-a piang leh sei lian ka ni a, he club tan hian tih ka la nei lo. Chuti chung chuan ṭha takin min dawng sawng a, ka ngai hlu tak zet a, ka chunga an ṭhatna hi ka hre reng ang," tiin a sawi.
Amorim chuan sawi chhunzawmin, "Ni e, hlauhthawnna ka la ngah. A chhan chu inkhel kan thunun thei lo. Thil thar tih kan tum a, game tinah ngaihdan thar kan nei a, player ka la hre chiang lo. Kan hmalam hi a harsa dawn a, hei chu club leh coach te tawn ṭhin a ni. Mahse, fan, player leh staff te kia ring tawk a, helai hmun hi nuam ka ti," tiin hma an sawn zel tur thu a sawi.
Man United-in Erik Ten Hag hnuaiah player inhliam an ngah a, tunah chuan player inhliam te an dam ṭan. Bodo/Glimt lakah goal khungtute chauh ni loin Antony leh Mason Mount te thlengin an khel ṭha a, Amorim-a tan pawh starting eleven thlan thiam a har phah ngei ang.