A ṭha 16 zingah Lengpui leh Chhinga Veng

G.I.G Motors MFA All Mizoram Inter Village Football Championship 2024-ah nimin khan Lengpui leh Chhinga Vengin hnehna an chang a, last 32 khelh zawh a ni. Last 16-ah Aizawl pawn aṭangin team pali Kolasib Jt, Melbuk, Sihphir Venghlun leh Lengpui an la dam.

Inkhelh thiam khua Lengpuiin harsatna an tawk lo a, Tuivamit chu 8-0 in an sawp. Chhinga Veng leh Mamit Jt te an inkhel tawk a, R. Malsawmtluanga goal hmangin Chhinga Veng 5-4 in an vannei zawk.

An in thlau hret

Lengpui leh Tuivamit an inthlau hret a, Lalbiaknia (Valtea) hoten first half leh second half-ah goal li ve ve an khung.

Lengpui tan Chanmari tana khel Lalrokima'n goal hmasa pahnih a khung hnuin Hmingchungnunga'n goal hnih a khung belh. Second half-ah Vanlalṭhafamkima'n goal hnih a khung bakah Lalhmangaiha leh Lalrinzuala ten goal khat ve ve an khung.

Inkhel tawk

Beisei lawk ang ngeiin Mamit leh Chhinga Veng te an inkhel tawk a, a tawpah tawhriat ngah zawk Chhinga Veng an chungnung. Chhinga Vengin bul ṭan ṭhain F. Lalnuntluanga hmangin minute ruknaah an khung nghal.

Mahse, Mamit lamin Mizoram striker Lalthanpuia (Tepuia) an kawl a, Tepuia hian first half-ah siphurh sutna goal ṭum hnih a khung. Tepuia goal hnih khung inkarah Chhinga Veng tan Romuanpuia'n a khung bawk.

First half-ah 2-2 a ni a, Chhinga Vengin Tluangtea leh R. Lalnuntluanga te hmangin goal an khung belh leh a, minute 55-naah 4-2 a ni. Chhinga Veng dinhmun ṭha mah se Lalbiakhlua freekick pet chu keeper tihsual vangin a lut a, Tepuia'n goal ṭha bik khung lehin minute 80-naah 4-4 a ni.

Team pahnih an innawr chhunzawm a, tawpah R. Malsawmtluanga telna Chhinga Veng team an danglam. Midfielder ṭha mi MS-a hian minute 88-naah a awmna tur taka a awm zarah chakna goal a khung. Last 16-ah Chhinga Veng leh Lengpui an inkhel ang.