Dortmund khelmualah Bayern an leng dawn

'Der Klassiker' tia hminglem an pek, German football-a inkhel ngaihven hlawh ber ang hiala chhal ngam chu zanin dar 11:00 hian a thleng dawn - Borussia Dortmund khelmualah Bayern Munich an lenglut dawn.

Bayern hian seaosn hmasa khan Bayer Leverkusen lakah nomawi an chân a, tun season-ah an champion nomawi hloh tawh neih let ngei tumin an ṭang hle. Vincent Kompany hoin table chung ber an luah mek a, league match 11 khelh tawhah anmahni hnaih bertu Eintracht Frankfurt aia an sanna chu point ruk a ni.

Hetihlai hian Dortmund-in tun season-ah beisei an phak lo a, table-ah pangana dinhmun luahin Bayern hi point 10 ngawtin an thlau mek. Zaninah Bayern an hneh theih chuan champion beiseina a nung thar leh thei ang.

Bayern an ṭha

Kompany-a'n beisei phak baka ṭhain Bundesliga-ah Bayern a kaihruai a, league match 11 a khelh tawhah vawi kua hnehna changin, vawi hnih draw an nei a, an la tlawm lo - goal 36 ngawt an khung tawh a, match 11-a goal 18 chhuah tawh Dortmund tlarhnung an zuam khawp ang.

Bayern hian Champions League-ah, a tir lamah beisei phak lo mah se, UCL lamah pawh an insiamrem leh tawh a, Dinamo Zagreb (9-2) an sawp hnuah Aston Villa (1-0) leh Barcelona (4-1) ngam lo mah se, Benfica (1-0) leh Paris Saint-Germain (1-0) an ngam leh tawh a, an inringtawk dawn.

Harry Kane-a'n tun season inelna hrang hrangah match 18 khelin goal 20 a khung tawh a, Dortmund tan ani hi ven bik ṭul a ni dawn. Hliam vangin Joao Palhinha (ṭhal), Hiroki Ito (ke phah ) leh Josip Stanisic (khup) te an la inlan thei lo zel a, Sven Ulreich chu mimal thil vangin a inlan thei dawn lo bawk.

Harh a hun

Player hlui Nuri Sahin-a kaihhruaina hnuaiah Dortmund-in tluk leh din an fawm a ni ber a, league-ah match hnih a zawna chak an la nei miah lo! Champions League-ah erawh match khat an tlawm tih loh chu chak loh an la nei lo a, match nga chak tawhin table-ah palina an ni mek.

UCL khel zo hlim an ni bawk a, Dortmund an inringtawk viau. Mahse, captain Emre Can chu hrem vangin a la inlan thei dawn lo a, hliam vangin Karim Adeyemi a la chawl mek bawk - an ṭhat dan berin Bayern an mikhual dawn lo.

Dinamoa Zagreb laka hliam vanga lakchhuah ngai Julian Brandt pawh a dinhmun a chiang lo a, Serhou Guirassy tan mawhphurhna lak ngam a ṭul dawn. Kum 28 mi striker hian tun season inelna hrang hrangah match 14 khelin goal 10 a khung tawh a, Bayern lakah a chet fuh chuan Dortmund tan beiseina a awm thei ang.