The Best FIFA Football Awards 2024: Mipa nominees-ah Lionel Messi a la tel

FIFA buatsaih chawimawina The Best FIFA Football Awards 2024 dawng thei tur nominee chu nimin khan puanzar a ni a, mipa chawimawina dawng thei tur zingah Lionel Messi a la tel. Ballon d'Or dawngtu Rodri bakah Vinicius Jr, Erling Haaland leh Jude Bellingham te an tel bawk.

The Best FIFA Football Awards-ah hian mipa leh hmeichhe tan player, coach leh goalkeeper chawimawina a awm. Heng chawimawina te hi fan, ram tin mipa leh hmeichhe captain leh coach bakah ram aiawh journalist ten an thlang dawn.

FIFA Fan Award

Mimal chawimawina bakah hian FIFA Fan Award a awm a, hei chu fan chauhin an thlang dawn. Thlan theih tura an chhawp chhuah chu Jose Armando, Craig Ferguson leh Guilherme Gandra Moura te an ni. FIFA.com-ah vote hi a thlak theih.

Armando hi Cruz Azul fan a ni a, thisen cancer vangin kum 14 mi chauh niin a thi. Chutihrualin a chanchin erawh a ngaihnawm a, chatuan ram a pan hma hian a club hmangaih player-te a hmu a, a chanchin hi Mexican football-ah sawi zui a hlawh hle.

Ferguson hi Scotland fan a ni a, Euro 2024 en tur khan Glasgow aṭanga Munich chu kein a kal a, 1,609 kilometres zet a kal. Hetia kal chhan hi mental health charity Brothers in Arms tan a ni a, £80,000 a hlawh chhuak a, India pawisa chuan nuai 86 vel daih a ni.

Gandra Moura hian natna danglam tak epidermolysis bullosa a vei a, nikhaw hre lova awm (coma) hnuah tho chhuakin a nu nena an inkuah video chuan ngaihven a hlawh hle. Amah hi Vasco da Gama leh Gabriel Pec (tunah chuan LA Galaxy) ṭantu a ni a, a club ṭante training tlawhin an inkhelte a thlir bawk.

Goal mawi thlanna

FIFA-in hmeichhe goal mawina thlanna kumin aṭangin a dah tel a, a hmingah FIFA Marta Award a vuah a, mipa goal mawi thlanna FIFA Puskas Award a awm zel bawk. Mipa leh hmeichhiaah hian goal 11 ve ve chhawp chhuah a ni a, hmeichhe lamah hian a hming tumtu Marta goal pawh a tel.

Mipa lamah hian Manchester United winger Alejandro Garnacho-a'n Everton laka bicyle kick goal a khung leh Europa League-a West Ham forward Mohammed Kudus-a'n Freiburg laka a khung pawh a tel. Goal mawi hi fan leh FIFA Legends ten an thlang dawn a, an vote hlut zawng pawh a inang chiah.

Player ṭha 11

The Best FIFA Men’s 11 leh The Best FIFA Women’s 11 thlan a ni leh dawn a, fan-ten thuneihna tawp an nei ang. FIFA.com kaltlangin a thlan theih.

Mipa leh hmeichhe category-ah hian player 77 chhawp chhuah a ni a; defender, midfielder leh forward 22 ṭheuh bakah goalkeeper 11 chhawpchhuah an ni.

Vote hi FIFA.com hi December 11, Nilaini zing dar 4:29 thleng vote hi thlak theih a ni ang.