Kan hmabak a pawimawh - Arteta

Arsenal manager Mikel Arteta chuan an hun kal tawh leh an result neih tawh ai chuan, an hma lama tih tur awmte chu a pawimawh zawk tih a sawi - Gunners hian zanin dar 11:00 hian West Ham nen Premier League an khel ang.

An chet fuh hleih theih loh hun a liam a, tunah chuan Arsenal hi an match hnuhnung pahnihah an chak leh tawh, inrintawkna sang tak nen Hammers an lenchilh dawn tihna a ni, an phur hle ang tih a rin theih.

Arteta chuan, "Hnehna kan chan hi chuan inrintawkna kan neih belh zel a, chu chuan kawng dikah min hruai ṭhin. A pawimawh ber chu kan hma lama tih tur awm a ni a, chumi atan chuan kan inbuatsaih zel ang.

"Khawpui leh ram inkar hlat tak takah kan inkhel nasa a, tunah chuan kan match hmabak 13 zinga 12 chu London khawpuiah kan khel dawn. Zin veivah hian tha a heh ṭhin, kan zin tlem tur hi thil lawmawm a ni," tiin a sawi.

North London club hian an captain Martin Odegaard an chhawr pangngai leh thei tawh a, Norway international midfielder awm hnuah an goal nawr a na leh ta hle, a bik takin Bukayo Saka chu a chhawrtu a ni, coach Arteta pawhin an beiseina siamtu a nih thu a sawi.

Arsenal hian hnehna an chang a nih chuan, an elpui Manchester City leh Liverpool te nen an inkar an tizim thei ang, an chunga mite pahnih hi Pathianni zanah an inkhel zui dawn a, rilru hahdam taka en theih an duh ngei ang.

Gunners manager Arteta chuan, "Europe khawmualpuia team ṭha pahnih an ni a, inel lai an ni bawk. Chiang taka ka sawi theih chu 100%-in a hmuhnawm ang, kan tan inkhel en nuam tak a nih ka beisei," tiin a sawi.