Spurs leh Roma inhnehtawk

Hun tawp dawna Mats Hummels-a goal khung hmangin AS Roma chuan an si phurh an sut zo a, an mikhualna ramah Tottenham Hotspur nen 2-2 a inhnehtawkin point khat ve ve an insem.

Ningani zan Tottenham Hotspur Stadium-a Europa League inkhelah Spurs hian an captain Son Heung-Min hmangin goal an khung hmasa, minute ngana lekah penalty aṭangin goal hmahruai an khung.

Paulo Dybala siamska hmangin Roma defender Evan N'Dicka-a'n si phurh a sut a, mahse chawlhlawk hmain Brennan Johnson chuan Tottenham goal hnihna leh an hmahruai vawi hnihna ni bawk a khung, a siamsaktu chu Dejan Kulusevski a ni.

Italian club tan Stephan El Shaarawy-a'n mawi zet maiin an goal hnihna khungah a inngai a, mahse VAR hman a nih hnuah offside vanga hnawlsak a ni. Spurs pawh an vannei reng bik lo, Johnson-a khung tur chu goal line aṭangin an lo petchhuahsak hman chiah.

Dominic Solanke-a shot an lo dansak bawk a, captain Son-a pawhin Kulusevski siamsak chu khung teuh viau - Manchester City laka goal li khung thei team hian Roma lakah goal hnih bak an khung chhunzawm thei tlat lo.

Spurs coach Ange Postecoglou-a'n goal khat chauha hma hruai chu a him lo tih a hria, bench aṭangin Yves Bissouma, Timo Werner, James Maddison leh Lucas Bergvall te luhtir mah se goal an sual chhuak zo ta bik lo a ni.

Claudio Ranieri enkawl Roma an beidawng duh bik lo, a tawpah an phu ang ngeiin goal an sualchhuak. Nipui bazar laia an lakluh Hummels chuan a tauhlut a, Italian club tan goal hlu tak niin point an hmuh theih chhan a ni bawk.

Spurs coach Postecoglou chuan, "Match khelh hmabak pathum kan la nei a, tuna kan awmna hi duhthusam chiah ni lo mah se a ṭha thawkhat hleah ka ngai. Roma nen khan inkhel hmuhnawm tak kan chhawp chhuak a, hetiang inkhel hi chu kar tin en tur pawh a awm lo," a ti.

North London club hian Premier League atan rilru an sawrbing leh nghal a ngai dawn - Pathianni zan dar 7:00 hian Fulham an mikhual dawn. Fulham nen an inkarah point khat chauh a awm a, season hman laiah team pahnih hi an inthlau lo.

Roma coach Claudio Ranieri pawhin a naute khelh dana a lungawi thu sawiin, "Napoli nen kan inkhelh kha chuan ka duh loh zawng thil ka hmu hnem, tunah erawh a danglam ta, ka naute an khel ṭha takzet. Kan team hian match hautak khelh dan kan la hria," tiin a team enkawl tharah beisei a nei tih a sawi.