Final kan khel dawn - King Carlo

Real Madrid-in ban an tum anga sawi thawm awm reng, Italian coach ropui Carlo Ancelotti a zam ve lo a, Champions League-a Liverpool laka tlawm hlim coach hian Alberto Cerrutti hnenah UCL final an khelh tur thu a sawi!

Spanish champion hi season hmasaa nomawi an chawina UCL-ah an talbuai mek a, Liverpool lakah 2-0 a an tlawm leh tak avangin last 16 lut lo thei dinhmunah an ding mek - hetiang boruak karah hian amah ngainatuten 'King Carlo' hminglem an pek coach hi a inringtawk hle.

Ancelotti hi Reds nen an inkhelh zawh khan a journalist ṭhian hnai tak, Spanish radio leh television channel lama football sawi ṭhin, journalist Alberto Cerrutti nen an inbia a, Ancelotti hian, "I duh duh lo sawi rawh. Real Madrid-in Munich khawpuia Champions League final kan khelh tur pawh hi lo hrilh lawk rawh," a ti a, champion nomawi humhim ngei a tum.

Real hian La Liga lamah pawh beisei an phak lo a, El Clasico-ah Barcelona chuan 4-0 ngawta an sawp avangin an boruak a chhe hman hle. Mahse, hemi hnu hian league match hnih khelin hnehna an chang ve ve a, Barca an tawlhthluk bawk avangin point li chauhin Catalan club hi an phak lo mek a, match khatin an khel tlem bawk.

Madrid khaw club hi Pathianni zan dar 8:45-ah league match khel turin an inlan dawn a, Getafe an mikhual ang. Hmahruaitu Barcelona chu zanin dar 6:30 hian an inlan dawn a, Las Palmas an mikhual ang.