FIFA presidential election A vawi nga nan Sepp Blatter a tling nawn
Tunhnai eiruak thubuai vanga hmingchhe mek FIFA chuan boruak duhawm lo tak tak karah Zirtawpni khan FIFA president thar thlanna an nei a, a vawi nga nan FIFA president nilai Sepp Blatter chu second round-voting-ah amah khingtu Prince Ali bin-al-Hussein inhnuhdawh avangin a vawi nga nan FIFA president-ah puan a ni.
FIFA president thlannaah hian tling turin first round voting-ah a tu emaw zawk zawkin vote hmun thuma ṭhena hmun hnih an hmuh tlin a ngai. Sepp Blatter leh Prince Ali te hian first round voting-ah vote hmuh ngai zat tling turin an hmu pha lo ve ve a, second round voting neih tura ruahman a ni. Mahse, second round-ah hian Prince Ali hi a inhnukdawk ta a, tling zawkah Blatter puan a ni ta a ni.
Blatter-a thu leh hla
Inthlanna neih a nih zawh hnu lawkah Blatter chuan, "Tunah chuan president ka ni leh ta a, mi zawng zawng president ka ni leh ta," tiin president atana thlan nawn a ni chu a hlim hle.
Kum 79-a upa Blatter chuan, "Tumah hi mi dik famkim vek an awm lo a, kei ngei pawh hian ṭhatlohna leh dik lohna tam tak ka nei ang. Vawiinah hian FIFA hi a nih dan dik tak ang ni leh turin ka bei dawn a, in thlawpna ka mawmawh dawn hle, FIFA hian hmalan panin ke a pen tur a ni," a ti.
Blatter chuan Prince Ali chu huaisen taka a inhnuhdawh avangin a fak bawk.
Second-round a inhnukdawk ta Prince Ali chuan, "Tling zo ta lo mah ila zinkawng duhawm tak kan zawh zo chiah a, huaisen taka min thlawp tlattute hnenah lawmthu ka sawi a ni," a ti.
Blatter-a tlinin engtinnge nghawng a neih ang?
Tunhnaiah eiruk thubuai vangin FIFA a mualpho a, kar hmasa lawk khan US Department of Justice chuan FIFA official pasarih lai eiruk thubuai an awrh tir a, Swiss Court-in 2018 leh 2022 World Cup thlen danah thamna sum che velah a ngai a, FIFA headquarters Zurich ami chu an chhui mek bawk.
Hetiang boruak hnuaih FIFA president atana Blatter duhlotu an tam a, mahse vote ngah khawmualpui Asian Football Confederation leh Confederation of Africa-in an thlawp miau avangin Blatter dal thei an awm lo.
Nigerian Football Federation president Amaju Pinnick chuan, "Blatter hian Africa khawmualpui min hrethiam em em a, intluk tlanna leh hmasawnna tam tak Africa-ah hian a rawn thlen a ni. Blatter hi awm lo se Africa hian tun dinhmun hi kan thleng phak lo ang," tiin Blatter-a'n thlawp chhan a sawi.
England Football Association chairman Greg Dyke chuan, "Tun hi a tawpna a la ni lo, FIFA president thlanna a tel tam tak kha Blatter an kham tawh takzet a, eirukna in FIFA a bu a khuar nghet em em hi an ngai thei lo," a ti.
Dyke chuan sawi chhunzawmin, "FIFA thlak danglam turin Blatter hi a tling tawk lo. Tuna bawlhhlawh awm zawng zawng hi amah vanga awm a ni a, kan hmalak dan tur kan la ngaihtuah leh dawn a ni. Kum hnih hnuah Blatter hi FIFA president ala nih chuan a mak ang," tiin Blatter paih thlak ala tum hle.
Blatter-a tling nawn leh a nih chuan World Cup hial boycott an tum thu lo tlangaupui tawhtu UEFA president Michel Platini chuan, "Kan dinna ngaiah UEFA kan ding nghet a, FIFA thlak danglamna tura kan hnathawhte avang hian ka lawm hle a ni. FIFA hian hmana a zahawmna kha nei let leh tur chuan inthlak danglam a mamawh a ni," tiin an beidawn mai loh tur thu a sawi fan.