Ancelotti leh Milan an inbia

Filippo Inzaghi en­kawlna hnuaia che chhe tak AC Milan chuan an manager hlui Carlo An­celotti chu San Siro-ah lak let leh tumin an be mek.

Real Madrid-in an manager aṭanga an ban hlim Ancelotti hi Milan chief executive Adriano Galliani nen an inbe tawh a, Nilaini a thutlukna siam turin an inṭhen. Nikum nipui laia AC Milan coach hna chelh ṭantu an striker ropui ṭhin Filippo Inzaghi chu season tharah manager hna a chelh tawh loh tur thu hrilh a ni.

Kum 54-a upa An­celotti hian season hmasa khan Real Madrid chu Champions League-ah a champion pui a, tun season-ah erawh eng trophy mah chawi loin a nil pui. Real-in a hna aṭangin an ban a, kum khat tal a natna spinal stenosis vanga chawlh a tum thu a sawi. Mahse, tunah a club hlui Milan nen inbiakna an nei a, a chawlh dawn leh dawn loh a chiang ta lo.

Chelsea leh PSG te pawh lo enkawl tawhtu Ancelotti hian kum 2001-2009 chung khan Milan hi a lo enkawl tawh a, kum 2004-ah Serie A-ah champion puiin kum 2003 leh 2007-ah khan Champions League title a lo chawi pui tawh bawk a ni.