Copa del Rey Messi leh Barca an champion

World player of the year ṭum li ni tawh Lionel Messi-a'n field dinglamah Athletic Bilbao player pathum a bum hnuah box chhungah defence pakhat bum lehin goal ropui a khung.

Inrinnni zan final-ah Barce­lona-in an khingpui Bibao 3-1 in an hneh a, Catalan club hi ṭum 27 nan Copa del Rey-ah an champion.

Nou Camp-ah Messi-a'n minute 20-na lekah goal ropui a khung a, Brazilian forward Neymar-a'n minute 36-naah goal khung lehin first half-ah Barcelona-in 2-0 in hma an hruai.

Minute 74-naah Messi-a'n Barcelona goal thumna a khung a, minute nga hnuah Bilbao midfielder Inaki Williams-a'n tauh goal mah se inkhel result a danglam phah lo.

Nou Camp-ah Barcelona 3-1 in an chak a, treble champion turin Champions League final-a Juventus hneh chiah a ngai ta.

Uchuak hret

Final-a goal luh hmain Messi pass chu Neymar-a'n goal-ah a chantir a, offside vangin pawm a ni lo. TV replay aṭangin assistant referee-in a phar sual tih a lang.

Neymar-a uchuakna erawh hun tawp hma hret a ni a, Brazil captain hian Bilbao defender Unai Bustiniza patlang a tumna lamah a in show hret a, Bilbao player an thimrim hle.

Neymar chuan, "Football a ni a, hetiang hi football-ah chuan a thleng ṭhin. Ball khalh pangngai a ni ve mai a, ka khelh dan hmang a ni. Hetiang hian kum tam ka khel tawh a, an thinrimna tur a awm lo, an thinrim avang hian ka sim lo ang," tiin a khelh dan a thlak loh tur thu a sawi.

Barcelona manager Luiz Enrique chuan, "Spain-ah chuan Neymar-a chet dan kha kan pawm lo, Athletic player chu ni ila, kha aia nasa khan ka khawsa ang. Chutihrualin Brazil-ah chuan thil thleng pangngai a nih avangin ka hriatthiam pui khawp mai. Thil awm dan ka la hrilhfiah ang," tiin a player a chhan hran lo.

Hun hnuhnung

Minute 56-naah Barca midfielder Xavi-a'n Spain leh club tana a khelhpui Andres Iniesta a thlak. Xavi tan Inrinni zan kha Nou Camp-a competitive match a khelh hnuhnun ber a ni a, Barca tana a game hnuhnung ber tur erawh Champions League final a ni.

Xavi hi minute 48-naah lut turin a inti lum ṭan a, mipui thawm a ṭha nghal hle. Spanish midfielder hian goal khungna hun ṭha a nei a, a freekick petin woodwork a per hlauh.

MSN an ropui

Messi, Suarez leh Neymar te hi Spanish football-a player pathum tlar hmaa inkawp hlawh­tling ber an ni.

Copa del Rey final-ah Messi leh Neymar ten goal thum an khung a, 2014/15 season-ah South American trio hian goal 120 an khung.

2011/12 season khan Real Madrid tlar hma Cristiano Ronaldo, Karim Benzema leh Gonzalo Higuain ten goal 118 an khung a, hemi ṭum hian Jose Mourinho hote hi La Liga-ah an champion.

Treble champion

La Liga leh Copa del Rey-ah Barcelona an champion a, Champions League final-a an hmachhawn tur Juventus hi Serie A leh Coppa Italia champion an ni.

Kuminah treble champion an awm dawn chiang a, June 6 zana Champions League final hi a hmuhnawm ang.

Barca manager Luis Enrique chuan, "Nomawi pathumna hi kan duh a ni. A eng zawngin kan thlir tur a ni a, a tak tak kan hre tur a ni bawk. Juventus hi treble champion thei tho an ni a, an ṭhat zia chu a chiang. Hneh theih loh kan ni lo. Treble champion kan nih theih chuan season chhinchhiahtlak tak a ni ang a, kan champion loh erawh chuan season danglam tak a ni hran lo ang," tiin a sawi.