France-ah PSG an ropui

Inrinni zan khan French club Paris Saint Germain-in French club dang la tih theih ngai loh an ti. Coupe De France (French Cup)-ah Auxerre chu 1-0 a hnehin an champion a, an ram chhung inelna hreng hrang pathumah an champion fai vek.

PSG-in Auxerre tlar­hnung rum ṭhaih zeuh zeuh mah se goal an khung thei lawk bik lo. Second half-ah erawh khel ṭha zawk PSG-in goal an khung ta nge nge a, an goal khung hi minute 64 naa Uruguayan striker Edison Cavani pet goal a ni.

Treble champion an ni thei chu Barcelona striker hlui Zlatan Ibrahimovic pawh a lawm a, Swedish striker chuan, "France ram chhunga trophy chawi theih ang zawng zawng chu kan chawi ta. France ram chhunga club dangin an la tih theih loh vawiinah hian kan tih avangin ka hlim hle a ni," a ti.

PSG coach Larent Blanc pawh a lawm a, French manager chuan, "Ṭha taka season kan khar theih avangin ka lawm hle. He cup hi chawi ngei duh mah ila a harsa dawn tih kan hria a, harsa takin kan chak a ni," tiin a chapo duh lo.

France national team pawh lo enkawl tawhtu chuan an khingpui Auxerre fakin, "Auxerre khan fak phu khawpin an khel ṭha a, an theihna zawng zawng an hlan a ni," a ti.

PSG hian tun season­ah Coupe De France nomawi an chawi hma hian Ligue 1 leh Coupa De la Ligue nomawi an lo chawi tawh bawk a ni.