German Cup champion Wolfsburg

Jurgen Klopp-a'n kum sarih chhung a lo enkawl tawh Borussia Dortmund champion nomawi nen ngei thlah a duh a, mahse Dortmund a enkawlna inkhel hnuhnung berah inrinni zan khan German Cup final-ah Wolfsburg chu 3-1 in an hneh lo. Wolfsburg-in an club chanchina a vawi khat nan German Cup nomawi an chawi.

Kum 47-a upa Klopp hian a hun hnuhnungah beisei ang result nei lo mah se kum sarih chhungin Bundesliga nomawi vawi hnih, German Cup vawi khat chawipuiin Champions League final a luh pui bawk a, a thil tih ṭhat hi an theihnghilh tawh lo ang.

Ball an pet

Dortmund hian goal khung tumin inkhelh ṭan tirh aṭangin an bei nghal a, Erik Durm leh Shinji Kagawa te inkawp chuan tlarhmaa awm Pierre-Emerick Aubameyang an chawm ṭha hle. Gabon international hian ṭan aṭanga minute rukna lekah an hmahruaina goal turin a volley goal nghal.

Minute 16 chu

Goal an phurh hma avangin tun season Bundesliga pahnihna Wolfsburg an talbuai duh lo. Minute 22 na a Naldo freekick pet chu Dortmund defender ten an pet chhuah mai loh avangin Luiz Gustavo chuan an hun remchang hmuin an si phurh sutna goal a khung.

Wolfsburg an phur chhun­zawm a, winger Kevin De Bruyne chuan minute 33-ah an hmahruaina goal a khung zui. An la duh tawk mai lo, Bas Dost chuan an goal thumna minute 38-ah a khung ve leh bawk. Dutch striker Dost hian tun season Bundesliga-ah goal 16 a khung tawh nghe nghe.

Minute 16 chhung lekin Dieter Hecking-a nauten goal thum an khung a, hun chanve an hman zawh hmain champion tur a chiang tawh. Kagawa leh Aubameyang ten an si phurh sut na hun nei mah se inkhel tawp thlengin goal dang an thun tawh lo.

Eng nge an sawi?

Wolfsburg hmahruaina goal khungtu Bruyne chuan, "Kan chak hi a lawmawmin a ropui hle a ni. Minute 20 chhung leka kan thiltih ka ngaihtuah let hian a turu ka ti tak zet. Thlasik chawlh kan hman zawh aṭang khan kan khel ṭha chho tluang tawh a, champion tur hian kawng hautak tak kan zawh avangin a tawpa hnehna kan chang hi a lawmawm bik a ni," tiin a sawi.

Tun season Bundesliga a goal 10 khung a, aṭhiante goal thun tur vawi 20 zet siamsak tu midfielder Bruyne hi Wolfsburg player of the season a ni nghe nghe.

Dortmund coach Jurgen Klopp chuan, "Ka ṭah a chhuah em avangin ka mittui a tla hial a ni. Kan chak loh vangin ka rilru a na a, ka chhuahsan tur Dortmund ka ngaihtuahin ka hnuk a ulh a ni. Inkhel bul kan ṭan ṭha viau nain kan tlarhnunglam an mutthluk avangin kan chesual ta a ni. Duhthusamin ka hun hnuhung ka hmang thei lo a, a pawi ngei mai. Champion Wolfsburg ka lawmpuia, an kal lehzelna turah duhsakna ka hlan e," tiin a sawi.