Rio Ferdinand a chawl ta
England captain hlui Rio Ferdinand chuan a khelh mekna Queens Park Rangers-in an chhuah zalen hnuah Inrinni khan football khelh a chawlhsan thu a puang.
Manchester United defender hlui Ferdinand chuan, "Kum 18 chhung professional footballer ka nih hnuin tun hi ka game hmangaih 'football' chawlhsan hun niin ka hria," tiin a chawlh tur thu a puang.
Kum 36-a upa Ferdinand chuan, "Kum 12 leka upa ka nih laia Friary Estate, Peckham-a ball ka pet lai khan West Ham tana khelhte, Leeds United tana captain-te, Champions League-a Manchester United champion puite leh Queens Park Rangers-a ka manager hmasa ber Harry Redknapp nena inhrawn leh te hi ka beisei ngai lo. England tana ṭum 81 ka khelh kha ka tan chuan thil hlu a ni a, hetiang zawng zawng ka tan chuan ro tling a ni a, ka dam chhungin ka hre reng tawh ang," tiin a nunhui a thlir kir.
May 1 khan Ferdinand-a nupui Rebecca Ellison chu hnute cancer vangin a thi a, England defender hlui hian a tuar hle.