Nadal dal thei an la awm lo

French Open 2015 third round chu khelh zawh a ni ta a, tournament ṭan dawn a beisei pha lo Rafael Nadal chuan a thiam ala theihnghilh lo a ni tih lantirin last 16-ah a inhlangkai leh ta.

Ṭum 10 nana champion leh tum Nadal hian a khingpui Russian Andrey Kuznetsov chu 6-1, 6-3, 6-2 in awlsam takin a hneh. Nadal hian last 16-ah American Jack Sock a hmachhawn leh ang.

Spanish Nadal hian minute 90 chhung lekin set hnih a la fel a, set hnuhnung berah pawh harsatna a tawk chuang lo. Third round inkhelah hian Nadal hian break point vawi 14 a hmuh aṭangin vawi riat a break thei a ni.

Kum 28-a upa Nadal chuan, "Ka inkhelh apiangin hmasawnna hmuh tur a awm zel e, tunah chuan ka inringtawk leh tawh khawp mai. Ka beisei angin thil a kal chho zel a, chak chhoh zel pawh ka inring. Vawiin kha inkhel awlsam tak a ni lo a, ka khingpui Andry khan service a neih ṭhat bakah a forehand kha a ṭhat avangin inkhelh a harsa hle. Ka vannei a ni," tiin a sawi.

Nadal hian French Open title vawi kua a la tawh a, champion ngun ber leh champion lai a ni.

World number 1 Novak Djokovic pawhin a thiamzia lan tir lehin Thanasi Kokkinakis chu inkhel inhnehtawk takah 6-4, 6-4, 6-4 in a hneh. Nadal leh Djokovic hian last 16 a an khingpui ve ve an hneh leh a nih chuan quarterfinal-ah an inhmachhawn thei dawn a ni.

Tun season a vawi 25 hnehna chang tawh Djokovic chuan a khingpui Kokkinakis chu fakin, "A kum zat ngaihtuah chuan a tharum leh thiamna kha ngaihnep chi a ni lo ang. Mipa tennis-ah hian hma hun eng tak a ni a ni," tiin a sawi.

Kum 19-a upa Australian Kokkinakis khan last 16 luh tumin thawk rim hle mah se a ram mipuite beisei ang result a nei zo lo. Kum 2007 a Lleyton Hewitt-a'n last 16 a luh bak kha chu Australian last 16 thleng an la awm leh lo.

A vawi 18 nana Grand Slam champion nih leh tum Roger Federer pawhin third round paltlang turin 6-4, 6-3, 6-2 in Damir Dzumhur a hneh bawk. Nizan khan khawtual tlangval Gael Monfils nen last 16 an khela result erawh kan hre hman lo. Kum 2009 hnuah Federer hian French Open nomawi a la chawi leh lo.

British mipui ṭan rawn, an beisei anga result ṭha neih sak thei meuh lo Andy Murray chuan mipa palian dangte tih ang thoin set hloh loin Australian Nick Kyrgios lakah 6-4, 6-2, 6-3 in hnehna a chang. Murray hian last 16 lut turin darkar khat leh minute 59 chhung lekin Kyrgios-a service hi vawi sarih a chhuhsak hman a, awlsam takin hnehna a chang.

Hmeichhe lamah World number 1 Serena Williams leh champion lai Maria Sharapova ten last 16 an lut. Kum 2008 French Open champion Ana Ivanovic paw'n minute 53 chhung lekin Donna Vekic chu 6-0, 6-3 in a hneh. Kum 2007 khan Ivanovic hian final a lo lut tawh bawk.

Kum 27 a upa Ivanovic chuan, "Grand Slam dangte ai chuan ka tan chuan French Open hi a nuamin ka inring tawk bawk. Kuminah pawh hian hnehna changtu nih zel ka tum. Ṭawiawmtu ṭha tak tak nei chunga chak chu a lawmawm dan a dang ngei mai," tiin a sawi.

Kum 2014 FIFA World Cup champion Germany midfielder Bastian Schweinsteiger chuan a bialnu Ivanovic inkhel hi a hmunah a ṭawiawm.