Laipuiin goal li leh nomawi a kapchhuak

FA Cup final-ah Arsenal an chungnung lawr lak a, an khingpui Aston Villa tan chetna hun an siam lo. Arsene Wenger hoten a kum zawna FA Cup nomawi chawi turin Theo Walcott, Alexis Sanchez, Per Mertesacker leh substitute Olivier Giroud te goal hmangin Wembley Stadium-ah Villa 4-0 in an sawp.

2004 FA Cup final hnu lamah FA Cup-a champion-ten final-ah goal khat bakin hnehna an chang ngai lo. Inrinni zanah erawh inkhel ṭan phat ṭangin Arsenal an hmuhnawm nghal a, nomawi duhin an tuihal tih a chiang.

Aston Villa tan tawnhriat nei ṭha keeper Shay Given-a'n French defender Laurent Kos­cielny a dan sak a, Walcott-a khung tur Villa defender Kieran Richardson-a'n goal-line aṭangin a dang a, Arsenal midfielder Aaron Ramsey a vannei tawk lo bawk.

Villa vanneihnain first half a daih lo a, minute 40-naah league match tawp bera West Brom nena hattrick siam vanga Giroud aia thlan Walcott-a'n Arsenal manager Wenger beiseina ti hlawhtlingin goal hmahruai a khung a, team goal a ni a, Arsenal goal khung dan tur renga mawi a ni.

Second half-ah Arsenal-in Villa insemremna hman an pe lo a, ṭan aṭanga minute ngana lekah Chile forward Sanchez-a'n kawh zetin a pet lut a, keeper Given a che hman meuh lo a, goal ropui a ni.

Arsenal-in goal hnih an khung hnuah chak tur a chiang a, chak tur ringawt hre duh tan inkhel a tawp a ni ber a, amaherawhchu game class thlir duh tan hmun tur a awm zel. Villa striker Cristian Benteke-a tlar hmaah a nil ṭhak a, tlar hnungah lah Mertesacker a ven loh vangin German defender-in minute 62-naah Arsenal goal thumna a tauh lut.

Villa club neitu Randy Ler­ner leh Villa fan Prince William te hmaah Villa an che thei lo a, bench aṭanga rawn lut Giroud-a'n injury time-ah Arsenal goal lina a khung a; Arsenal keeper Wojciech Szczesny-a'n ṭha taka dan tur a nei lo. Arsenal player-te kil tinah an chungnung a, goal luh tam vanga tlar hma lansarh zanah hian midfield thununtu Santi Cazorla leh Francis Coquelin te hming sawi hmaih a thiang lo.

Arsenal-in an phu ang ngeiin nomawi an chawi a, Villa erawhin kum 58 chhung an nghah tawh FA Cup nomawi chawi turin hun rei zawk an la mamawh ang.

Chak lo thukhawchang

Aston Villa manager Tim Sherwood chuan, "Chhuanlam tur ka nei lo. An khel ṭha em a ni. Player ṭha bik an kawl a, kan theihna a inthlau deuh a ni. Kan midfield pali bakah kan right back ten yellow card a hmu tawh a, chet a harsa takzet a ni. Tlang taka sawi chuan 3-0 a nih kha chuan hreawm ka ti lutuk kha damdawi ei ka mamawh tawh a, hun tawp dawna goal kan chhuah leh chiah kha chu serha inpet sak tluk zetin a na a ni," tiin Arsenal chak an phu a tih rualin hreawm a tih thu a sawi tel bawk.

Sherwood chuan season thar thlirin, "Hmasawn zawng­in kan kal zel tur a ni, player thar kan la lut lo a nih chuan kan neihsa siam ṭhat hi kan hna tur chu a ni. Final-ah kan supporter-te tan auhna hun kan siam sak lo a, amaherawhchu ka tiam duh chu Premier League aṭanga tlak hlauawmah kan awm tawh lo ang," tiin a sawi.

Chak thukhawchang

Arsenal manager Arsene Wenger chuan, "Ka hlim a, ka hlawhtlinna hi ka chhuang a, ka phur takzet bawk. Hetiang dinhmuna ka awm chhan hi FA Cup kan champion vang chauh a ni lo, kan champion theihna tura final-a kan khelh dan kha ka lungawi em em a ni. Ṭha takin bul kan ṭan a, a tawp thlengin kan khel ṭha a ni. Player tin kha an khel ṭha em em a, sawisel tur pakhatmah ka hmu lo," tiin an khelh danah a lungawi hle.

Wenger chuan sawi zelin, "Nikum season ṭantirh aṭang khan hmasawn zawngin kan kal a, tunah chuan kan team hi kan puitling tawh takzet a ni. Kan player-te an inhrechiang a, game ropui tak an khel a ni," tiin a sawi.