WBC World Youth title hnek chhuaktu Laldinsanga

Boxing khawvelah Mizo hming a mawi leh ta - Mizo tlangval Laldinsanga chuan Michael Decardi Nelson (Ghana) hnehin, bantamweight-ah WBC World Youth title a hlawh chhuak a, Bengaluru khawpuiah Mizo tlangvalin hnehna hlado a chham.

White Houzz, Bengaluru-a inhnekah hian Mizo tlangval dang F. Zoramchhana leh Vanlalawmpuia te pawhin an khingpui ve ve an hneh a, WBC India title beiseitu C. Lalhruaitluanga erawh a khingpui lakah a vanduai.

Dinsanga hi Mizo boxer zinga WBC World Youth Title la thei pahnihna a ni a, kum 2021 khan Lalrinsanga Tlau chuan WBC Youth Super Featherweight title a lo la tawh bawk.

Dinsanga a ding chhuak

Kum 21 mi Dinsanga hian Ghanaian boxer Michael Decardi Nelson a hmachhawn a, a tir lamah mikhual tlangval Michael hian inhnek a thunun zawk - Mizo tlangval Dinsanga lu a hai a, thla a phang hman hle.

Mahse, round li velna aṭangin LPS Pro Fight champion Dinsanga a insiam rem a, a hnek chhuak hnem a, a fitness a ṭha tih a lang bawk. Bangalore khawpuiah Ghanaian boxer a talbuai tulh tulh a, round riat an khelh meuh chuan Mizo tlangval a dingchang.

Mizo boxer coach R. Lalchhuanawma (Setea) chuan, "A tir lamah kan talbuai a, mahse, kan khelh dan kan thlak chho a, kan khingpui lam kha a talbuai ve ta a ni," tiin hnehna an chan dan Vanglaini a hrilh.

Hmabak a êng

Kum 21 mi Dinsanga'n 79-71, 77-74, 78-73-in (unanimous decision) hnehna an chang a, a inlanna WBC World youth title hi kum 18-23 inkar tana inelna a ni - vawi kua inhnek a hmachhawn tawhah Mizo boxer hi a la chak fai vek!

Dinsanga hnehna chan tihlu zualtu chu a hneh tak Michael Decardi hi boxer ṭha tak a ni. Ghanaian boxer ṭha hian Mizo tlangval a tawn hma hian vawi kua professional fight neiin, vawi riat a chak a, vawi khat draw a nei.

Tlawm nei lo record duhawm tak a chelh mek chu chhunzawm zel tumin India a lo chuang chhuak a, mahse, Dinsanga hmaah a tlawm. Setea chuan, "Dinsanga hian hmabak êng tak a nei a, a record pawh a ṭha hle - a kal zel dan tur erawh kan la sawi thei lo," tiin Vanglaini a hrilh.

Mizo val

Inrinni zanah hian Dinsanga bakah Mizo boxer dang pawh an inlan. F. Zoramchhana chuan Noberto Tano chu unanimous decision-in a hneh a, Cherhlun tlangval Zotea hian professional fight vawi 11 a hmachhawnna niin, vawi riat a chak ta a, vawi thum a tlawm tawh.

Vanlalawmpuia pawhin unanimous decision-in hnehna a chang a, Uganda boxer Kagimu Ivan Kigga chu super lightweight-ah a hneh - Awpa hian vawi 13 fight a hmachhawnna niin, vawi 10 a chakna a ni. Vawi thum a tlawm a, a chak zinga vawi sarihah a khingpui a knockout.

C. Lalhruaitluanga'n vawi 10 fight a hmachhawnnaah WBC India title a beisei a, mahse, light heavyweight-a inlan boxer hian Ritesh Singh chu unanimous decision-a hneh loin a tlawm - vawi 10 fight a hmachhawnah vawi thum a tlawmna chiah a ni.