Mizo hlang Aizawl FC an chak

I League-ah Mizo hlanga khel Aizawl FC-in Zirtawpni zan khan kai thar SC Bengaluru 2-0 in an hneh a, Victor Lalbiakmawia hote tan tun season-a an chakna hmasa ber a ni. Aizawl FC hian I League match hnih an khelhah goal an la chhuah lo a, Mizo hlanga khel chungin tlarhnung a phui ṭha hle.

MPL11 champion Aizawl FC hian anmahni ang bawka point li hmu Gokulam Kerala lakah fiahna an hmachhawn nghal dawn a, nimin khan Aizawl an chhuahsan. December 3, Thawhlehni zan dar 7:00-ah AFC leh Gokulam te hi EMS Stadium, Kozhikode-ah an inkhel ang.

Point 3 chu

Aizawl FC-in ṭantu an nei chhe lo a, RG Stadium-ah mi 1000 bawr vel an pung khawm. Coach Victor-a'n Dempo nen an inhnektawk ṭum aṭangin player pakhat chauh a thlak a, Mizo club hian I League 2 champion lakah inkhel thunun thei bik lo.

Tlarhmaa Lalrinzuala'n bul a ṭan tawh a, goal nawr na thei lo mah se minute 21-naah mikhual team defender Shanid Valan-a back pass chu keeper Satyajit Bordoloi-a'n dang ṭhelhin goal-ah a lut.

Goal khatin Aizawl FC phurna a pe a, Lalchhawnkima hoa khel defender-te match hmasa ber ang thoin an khel ṭha a, defensive midfielder Lalthankhuma'n (TK-a) a hna a tlin viau bawk.

Second half-ah Bengaluru lamin crossbar hial rawn tih per mah se substitute Lalhriatpuia'n box pawn aṭangin Sawma Tlangte ball pek chu kawh zetin a pet goal. Hriata hian a chet chhiat ber lai pawha ring ngamtu coach Victor lamah tlan pheiin a va kuah nghal. Victor hian Hriata hi Chanmari FC tana beisei a phak loh lai pawhin I League khel tlak a nih thu Vanglaini a hrilh tawh a ni.

AFC record a ṭha

Aizawl FC hian tun season-ah match 25 an khel tawh a; MPL, I Day Football leh I League-ah chak loh h vawi khat chauh an la nei a, match 25-ah goal khung loh ṭum hi vawi khat chauh vawi thum chauh an la nei bawk.

MPL leh I Day Football-ah Aizawl FC-in goal an khung hnem a, tlarhnung lam a phui ṭha. Match hnuhnung pasarihah Aizawl FC-in goal an chhuah tawh lo a, an record hi a ropui hle.

Coach Victor chuan, "Dempo lakah chak theihna hun ṭha kan bawhpelh a, Bengaluru-ah erawh kan phu ang ngeiin kan chak. Chutihrualin insiamṭhatna tur a la tam a, ball kan chanin kan inrintawk lehzual a ṭul a ni," tiin Vanglaini a hrilh.