RG Stadium-ah ennawm hmuhnawm : Kolasib Jt vs Republic Veng; BVT vs Salem Veng

GIG Motors MFA All Mizoram Inter Village Football C'ship 2024-ah team ṭha 16 chauh an dam tawh a, RG Stadium-ah a ṭha pariata tel tlaka ngaih theih team pali an inlan dawn. Chawhma dar 11:00-ah Kolasib Jt leh Republic Veng te an inkhel ang a, chawhnu dar 1:30-ah Bethlehem Vengthlang leh Salem Veng te an inkhel zui ang.

Kolasib Jt-in player ṭha an ngah a, an result pawh a ngaihnawm a, an khingpui tur Republic Veng an duai bik lo a, veng/khua inelnaah record an nei ṭha zawk. BVT leh Salem Veng te hi inkhelh thiam veng ve ve an ni a; Salem Veng hian player an nei ṭha hretah ngaih theih mah se BVT hi coach Lalsangzuala Hmar enkawl an ni.

En châkawm chu

Kolasib-in last 16 thleng turin goal an khung theihzia an pholang a, match hnih lekah goal 26 ngawt khungin Sakawrtuichhun (21-0) leh Mission Veng (5-0) te an sawp.

Coach Lalchhuansanga hian kil tinah player ṭha chhawr tur a nei a tih theih a, a bik takin tlarhma lamah an ṭha zual. Mizoram Police winger Isak Malsawmkima'n goal nga a khung tawh a, a thla leh lama awm RM Zothansanga'n goal li a khung tawh.

Aizawl FC academy player PC Pazawna pawhin goal li a khung tawh a, tawnhriat nei ṭha William Lalnunfela an kawl. Midfield-ah ISL club tana pawha khel tawh Paul Ramfangzauva an kawl a, Chanmari FC midfielder hlui C. Lalhunmawia (Lahuna) a la awm cheu. Paul hi NECS CUP 2019 khan Republic Veng final a thlenpui a, a khingpui tur veng lam pawh hian a theihna an hrechiang khawp ang.

Republic Veng hi F. Lalrinpuia'n an enkawl a, Valpuia hi player angin a inziaklut nghal. Last 16 lut turin Republic Veng hian Falkawn 2-1 leh Chawnpui 5-2 te an hneh a, position tinah innghahna tlak player an awm.

Captain Lalnunzira'n goal thum a khung tawh a, midfield-ah B. Rosangliana (Bawiha) nen an inkawp rem hle. Tlarhma lamah Valpuia leh Police tana a khelhpui Lalramthara te an awm a, mual sirah Laltluangliana leh Lalruatsanga ten an thlawp. Tlarhnungah Mizoram defender Lalmuanawma'n (Munez) hmun pawimawh a chang a, FC Bethlehem-a khel Sena nen inkawpin an ṭangkai hle.

Rin thiam a har

Bethlehem Vengthlang tan ISL player K. Lalṭhathanga (Puitea) leh PC Laldinpuia te an khel thei lo a, coach Sanga'n enkawl mah se player ṭha ber chhawr tur a nei lo. Hei vang hian Salem Veng lakah dah san an harsa.

BVT hian last 16 thleng turin Marpara (4-1), ITI Veng (2-0) leh Hriphaw (7-2) ten an hneh a, harsatna lian tham an la tawk lo. Goalkeeper-ah MPL-a Chawnpui champion puitu Lallawmzuala an kawl a, midfield-ah talent nei ṭha Emanuel Lalhruaizela an nei. MPL club nei tawh lo mah se First Division club ṭha tak an nei tih hriat a ṭha bawk.

Salem Veng hian team ṭha Dinthar (5-3) leh Thenzawl Jt (2-1) te an hneh a, striker David Lalchhuanawma'n goal li khung tawhin tun dinhmun an thlen theihna chhan a ni. Coach Sanga'n a player-te David-a ven tir dan tur hi en châkawm lai a ni thei ang. Inkhelhna tur hmun RG Stadium hi Salem Venga awm an ni a, entu mipui hi BVT laka an chungnung theihna tur a ni.