1st Bn MAP Ground-ah team ṭha pali: Durtlang Vs Melbuk; Armed Veng Vs College Veng

GIG Motors MFA All Mizoram Inter Village Football C'ship 2024 boruak a nung chho zel. Vawiin chawhma dar 11:00 hian 1st Bn MAP Ground-ah Durtlang leh Melbuk an inkhel dawn a, dar 1:30-ah Armed Veng leh College Veng te an inkhel zui ang.

Team ṭha ve ve

Inkhel pahnihah Durtlang leh Melbuk hi en châkawm zawk a tih theih. Durtlang hian Tanhril 1-0 a an hneh hram hnuah Ṭhuampui 8-0 in an sawp a, Vairengte Jt 2-1 in an hneh leh tawh bawk.

Durtlang hi Ricky Lallawmawma'n a ho a, ISL thlenga tawnhriat nei defender hi team chakna thahrui a ni. MPL emaw phai lam emawa tawnhriat nei Joseph Lalsanglura, Joseph Vanlalhruaia, Lalmuanzova leh Laliansanga te an awm a, Santosh Trophy-a Mizoram player pathum C. Zohmingsanga, HK Lalhruaitluanga leh Crespot Vanlalhriatpuia te an kawl bawk.

Mahse, Durtlang khingpui tur Melbuk hian an khingpui apiang an la sawp. Zanlawn (4-0), Saikhamakawn (5-1) leh Phunchawng (12-0) lakah Lalrozara enkawl team-in an ṭhatzia an pholang. Melbuk hian Lalsawmzela, Lallawmsanga (LS-a leh Ephraim Lalremtluanga te an awm a, Lalbiakmuana leh Robena te hi hming chher chho thei tura ngaih an ni.

Intluk tawk tur

Veng/Khua inelnaa record nei ṭha Armed Veng hun a liam ta emaw tih theih tur a ni a, chutihrualin Lalramchullova enkawl team hian Police captain Lalfakzuala an kawl a, Police player dang H. Lalbiakthanga leh Lalbiakhlua (Hlutea) te an nei tih hriat a ṭha.

Chutihrualin Armed Veng hian last 16 thleng turin an khingpui Ramthar (1-0) leh Chaltlang Lily Veng (1-0) te an hneh hram a, Leitan Ramthar erawh 6-2 in an sawp thung.

College Veng hian Ramhlun Sports Complex 6-0 a an sawp hnuah Lungdai 1-0 in an hneh hram. Ramthangliana enkawl team hian R. Laldanmawia an kawl a, ani hi danglamna thlentu a la ni. Chutihrualin Mizoram goalkeeper Zothanmawia chu centre back-ah an chhawr a, a khelh tawh chinah a rintlak hle.