MBBA-in Ruby Jubilee a lawm

Mizoram Basketball Association chuan November 30, Inrinni khan Taxation Department, Auditorium, MINECO-ah kum 40-na Ruby Jubilee a lawm. An hruaitu hlui leh an adviser ni mek Education Dept minister Dr.Vanlalthlana chu khuallian a ni.

Kum 1976 khan Mizoram State Sports Council hotu ten state level association hrang hrang an siam a, chung zingah chuan Basketball & Volleyball Association pawh Adhoc body-in din a ni a, amaherawhchu basketball hi Mizo zingah khel an tam loh avangin mumal takin pawl hi a awm zui ta lo.

Hun a kal zel a, kum 1982-ah J.Vansangzuala, Mission Veng chuan basketball-ah NIS Coach a rawn zir chhuak a, ani hmalakna avang hian basketball khel ṭhin te pawh an lo awm chho ve ta pheuh pheuh.

Tichuan kum 1984 a lo inherhchhuah chuan Mizoram State Sports Council pawmpuinain Mizoram Basketball Association (MBBA) tiin din a ni. MBBA hi Mizoram Co-operative Society-ah registration te tih a ni a, kum 1987-ah Basketball Federation of India-ah a inziaklut.

Kum 40 a liam leh meuh chuan India aiawh khel thei Mizo player bakah manager leh coach te pawh an awm ta hial a, Mizoram Super League phei chu India rama basketball inelna changtlung zinga mi a ni. Ruby Jubilee lawmnaah hian MBBA Office Bearers lo ni tawh ṭhinte ngaihhruina thilpek te pein, international leh national level a mi hlawhtlingte chawimawina hun an nei bawk.