Laipui vawi nga a puak

Arsenal chuan Premier League champion tum ngam an nihna chu a takin an lantir leh ta - Champions League khelh hah pawh sawi hman loin West Ham an lenchilh zui leh nghal a, laipui vawi nga ngawt hmel puakin Hammers chu 5-2 in an hneh.

Mikel Arteta naute hian EPL table-ah pahnihna dinhmun an luah lailawk, hmahruaitu Liverpool nen an inkarah point ruk a awm, nizan khan Reds leh Manchester City an inkhel a, result a zirin an dinhmun a la danglam thei thung.

Laipui a puak

London Stadium-a inkhelah goal kan hmu hma hle - Gabriel Magalhaes, Liandro Trossard, Martin Odegaard leh Kai havertz ten goal an khung nghal a, minute 36 an khelh chuan mikhual lamin 4-0 in hma an hruai fel der tawh.

Chawlhlawk hmain goal thum dang kan hmuh belh - Hammers tan Aaron Wan-Bissaka leh Emerson ten an sut ṭhen hnuah, forward Saka chuan an goal ngana chu penalty aṭangin a khung a, inkhel chawhnu lamah goal kan hmu zui tawh lo.

Odegaard a dam ṭha tawh a, an boruak ti fuh zual turin Saka chuan penalty a kian. England international hian penalty a hlawh chhuah bakah Gabriel leh Trossard te khung tur a siamsak tho, a hnu lamah penalty a khung leh bawk - an chak theihna chhan langsar a ni.

Gunners hi an captain Odegaard inhliam lai khan an goal nawr a na tawk lo, a tuartu langsar tak chu Saka a ni. Tunah erawh Saka leh Odegaard te an inkawp rem leh ta hle, a hliam dam hlima Saka lawmna kha khelmual chhungah a takin kan hmu.

Kawng dik zawh

Arsenal manager Mikel Arteta chuan, "Kan khingpui team hrang hrang pathumte chu kan hneh ta vek a, tunah chuan kawng dik zawhin hma lam kan pan leh ta, inkhel hmuhnawm chhawp chhuak chunga kan chak avangin a lawmawm.

"Fimkhur taka hun kan hman chhunzawm erawh a ngai dawn, ni thum dan lek lekah match kan khel a, kan chet ṭhat hnu lawkah talbuai leh thut thei kan nihna hi kan hriatchian a ngai hle a ni," a ti a, a naute rilru puthmang chuan a ti lawm tih a sawi bawk.

Arsenal hian Nilaini zanah Premier League match hautak khel turin Manchester United an mikhual zui leh nghal dawn, coach thar Ruben Amorin enkawl lo dawngsawng turin inbuatsaihna hun ni thum chauh an nei tihna a ni.

Gunners tana lawmna tur erawh an player hliamte an dam chho zel a, player siksawi tur an nei ta nual. UCL leh league lama khel an hrang ta zauh zauh - Man United lakah chuan a ṭha thei ang bera inlan an duh ang.