Dortmund khelmualah Bayern chak zo lo
Inrinni zan khan Borussia Dortmund khelmualah Bundesliga hmahruaitu Bayern Munich an lenglut a, team pahnih inkhelah chak zawk an awm lo - 1-1 in an inhnehtawk a, point khatah lungawi an zir ve ve.
Dortmund tan season duhawm tak hmangtu Jamie Gittens chuan goal hmahruai a khung a, mahse, Signal Iduna Park-a inkhelah mualneitu hian an goal khung an hum zo lo - Jamal Musiala chuan si phurh sutna goal a khung.
Bayern Munich-in league match 12 an khelh tawhah tlawm an la nei lo tluang zel a, mahse, an chak zawh loh zanah thil duhawm lo dang an tawng. Striker chhuanvawr Harry Kane chu hliam vanga lakchhuah a ngai.
A hming Gittens
Dortmund-in hnehna chang zo lo mah se, an player duhawm Gittens a chet ṭhat zel avangin lawmna tur an nei. Kum 20 mi English winger hian minute 27-naah goal hmahruai a khung a, a goal khung hi goal ropui bik a ni.
Nico Schlotterbeck-a ball pek chu Gittens hian field chanve vel aṭanga chak taka tlan puiin, amah vengtu Bayern right back Konrad Laimer a tlanpel a, England Under-21 international hian penalty box-a a luhpui hnuah, Bayern keeper Manuel Neuer tana dan rual lohin, kawh zetin goal-ah a khung.
Kum 20 mi Gittens hian season duhawm tak a hmang mek a, Dortmund tan tun season inelna hrang hrangah match 19 khelin goal riat a khung a, assist vawi riat a nei. England Under-21 international hi Harry Kane tih loha 'Der Klassiker' a goal khung thei pahnihna a ni.
Kane a inhliam
Bayern-in goal an chhuah aṭanga minute ruk hnu lawkah chanchin lawmawm lo hriat tur an nei a, striker chhuanvawr Harry Kane chu hliam vangin lakchhuah a ngai - Kane hian tun season-a league match 12 a khelhah goal 14 khungin, assist vawi nga a nei.
Kane thlaktu Thomas Muller-a'n si phurh sutna remchang a neih a chhawr lo a, Bayern hi an tlawm mai dawn niin a lang hman. Mahse, hun tawp nan minute nga chiah a awm tawh tihah Jamal Musiala a inlar a, Michael Olise-a cross chu ṭha zetin a tauh lut.
Kum 21 mi Musiala hian tun season-ah hming a chher hle. Bayern tan inelna hrang hrangah match 17 khela goal 10 khungin assist vawi li a nei a, Dortmund lakah pawh a team mualpho tur a chhan leh ta.
Bayern hmabak
Vincent Kompany enkawl Bayern hi Thawhlehni zanah DFB-Pokal khel turin an inlan lehnghal dawn a, champion lai Bayer Leverkusen an mikhual dawn avangin a awlsam dawn lo tih a chiang - Kane inlan theih dawn leh dawn loh a la hriat loh.
Kompany chuan, "Harry-a'n a hliam a nat lutuk loh thu min hrilh a, mahse, kan enfiah phawt ang. Thawhlehni zana inlan nghal tur chuan a harsa mai thei a, chutiang ang taka dam chak thei tur player chu an tam loin ka hria.
"Kane-a goal khung zozai hi kan tan thlak ngawt theih a ni dawn lo a, chutihrual chuan squad pumpuiah hian kan rinna kan nghat tlat a ni," tiin a sawi.